ടോക്യോ: ജപ്പാനിലെ വടക്കുകിഴക്കന്‍ മേഖലയില്‍ വന്‍ ഭൂചലനം. റിക്ടര്‍ സ്‌കെയിലില്‍ 7.4 തീവ്രത രേഖപ്പെടുത്തിയ ഭൂകമ്പത്തിന് പിന്നാലെ പ്രദേശത്ത് സുനാമി മുന്നറിയിപ്പ് പുറപ്പെടുവിച്ചു. ഭൂകമ്പബാധിത പ്രദേശങ്ങളിലുള്ളവര്‍ സുരക്ഷിതമായ ഉയര്‍ന്ന സ്ഥലങ്ങളിലേക്ക് മാറിതാമസിക്കണമെന്ന് ജപ്പാന്‍ പ്രധാനമന്ത്രി സനെയ് തകൈച്ചി ആവശ്യപ്പെട്ടു. 

പ്രാദേശിക സമയം വൈകീട്ട് 4.53ന് വടക്കന്‍ ഇവാട്ടെ പ്രിഫെക്ചറിന് സമീപം പസഫിക് സമുദ്രത്തില്‍ 10 കിലോമീറ്റര്‍ ആഴത്തിലാണ് ഭൂകമ്പമുണ്ടായത്. പ്രഭവകേന്ദ്രത്തില്‍ നിന്ന് നൂറുകണക്കിന് കിലോമീറ്റര്‍ അകലെയുള്ള ടോക്യോയിലെ വന്‍കിട കെട്ടിടങ്ങള്‍ പോലും കുലുങ്ങിയതായാണ് റിപ്പോര്‍ട്ട്. 

അതേസമയം ഭൂചലനത്തിന് പിന്നാലെ തീരപ്രദേശങ്ങളില്‍ സുനാമി ദൃശ്യമായതായി ജപ്പാന്‍ മാധ്യമമായ എന്‍എച്ച്‌കെയെ ഉദ്ധരിച്ച് റോയിട്ടേഴ്‌സ് റിപ്പോര്‍ട്ട് ചെയ്തു. സുനാമി തിരമാലകള്‍ ഉടനടി വടക്കന്‍ തീരത്ത് അടിച്ചേക്കാമെന്ന് കാലാവസ്ഥ ഏജന്‍സി മുന്നറിയിപ്പ് നല്‍കി.