ഭോപ്പാല്‍: ഇസ്‌ലാമിക മത ഗ്രന്ഥങ്ങള്‍ കൈവശംവയ്ക്കുന്നതോ ഏതെങ്കിലും പ്രത്യേക പ്രത്യയശാസ്ത്രത്തില്‍ വിശ്വസിക്കുന്നതോ ഭീകരപ്രവര്‍ത്തനങ്ങളില്‍ ഏര്‍പ്പെടുന്നതിന് തെളിവായി കാണാനാവില്ലെന്ന് മധ്യപ്രദേശ് ഹൈക്കോടതി. ഭീകരബന്ധം ആരോപിച്ച് എന്‍.ഐ.എ അറസ്റ്റ് ചെയ്ത മൂന്ന് യുവാക്കള്‍ക്ക് ജാമ്യം അനുവദിച്ചാണ് കോടതിയുടെ സുപ്രധാന നിരീക്ഷണം. ഭീകരവാദക്കേസുകളില്‍ കൃത്യമായ തെളിവുകളുടെ അഭാവത്തില്‍ കേവലം വിശ്വാസങ്ങളെ കുറ്റകൃത്യമായി കാണാനാവില്ലെന്ന് നിരീക്ഷിച്ച കോടതി ഷെയ്ഖ് ജുനൈദ്, മുഹമ്മദ് വസീം, മുഹമ്മദ് കരീം എന്നിവര്‍ക്കാണ് ജാമ്യം അനുവദിച്ചത്. രണ്ട് ലക്ഷം രൂപയുടെ ബോണ്ടിലും കര്‍ശന വ്യവസ്ഥകളിലുമാണ് ജാമ്യം. 

ഇസ്‌ലാമിക ഗ്രന്ഥങ്ങള്‍ കൈവശം വെക്കുന്നത് ഭീകരവാദ പ്രവര്‍ത്തനങ്ങളില്‍ പങ്കാളികളാണെന്ന് സ്ഥാപിക്കാന്‍ പര്യാപ്തമല്ലെന്നും ഒരാളുടെ പ്രത്യയശാസ്ത്രപരമായ ചായ്‌വോ തീവ്രചിന്താഗതിയോമാത്രം കുറ്റകൃത്യമായി കണക്കാക്കാനാവില്ലെന്നും കോടതി വ്യക്തമാക്കി. കുറ്റകൃത്യങ്ങളെ സാധൂകരിക്കുന്ന തരത്തിലുള്ള നിയമവിരുദ്ധമായ പ്രവൃത്തികള്‍ ഉണ്ടെങ്കില്‍ മാത്രമേ നടപടി സ്വീകരിക്കാവൂ. പ്രതികള്‍ക്കെതിരേ ഡിജിറ്റല്‍ തെളിവുകളോ ഫോണ്‍ സംഭാഷണങ്ങളോ മറ്റ് നിയമവിരുദ്ധ പ്രവര്‍ത്തനങ്ങളോ ഹാജരാക്കാന്‍ അന്വേഷണ ഏജന്‍സിക്ക് കഴിഞ്ഞില്ല. കേവലം മതഗ്രന്ഥങ്ങള്‍ കണ്ടെടുത്തു എന്നത് മാത്രമാണ് എന്‍.ഐ.എ പ്രധാനമായും ചൂണ്ടിക്കാട്ടിയത്. സുപ്രിംകോടതിയുടെ മുന്‍ ഉത്തരവുകളും ഹൈക്കോടതി പരാമര്‍ശിച്ചു. വിചാരണ നീണ്ടുപോകുന്നതും കൃത്യമായ തെളിവുകള്‍ ഹാജരാക്കാത്തതും പ്രതികളുടെ അവകാശങ്ങള്‍ ലംഘിക്കുന്നതാണെന്നും കോടതി ചൂണ്ടിക്കാട്ടി.