അബൂദബി: ഗതാഗതക്കുരുക്ക് കുറയ്ക്കുന്നതിന്റെയും റോഡ് ശൃംഖലയുടെ കാര്യക്ഷമത വര്‍ദ്ധിപ്പിക്കുന്നതിന്റെയും ഭാഗമായി അബൂദബിയില്‍ രണ്ട് പുതിയ ദര്‍ബ് ടോള്‍ ഗേറ്റുകള്‍ കൂടി ഇന്ന് മുതല്‍ പ്രവര്‍ത്തനമാരംഭിക്കുന്നു. മുന്‍സിപ്പാലിറ്റീസ് ആന്‍ഡ് ട്രാന്‍സ്‌പോര്‍ട്ട് വകുപ്പിന് കീഴിലുള്ള ഇന്റഗ്രേറ്റഡ് ട്രാന്‍സ്‌പോര്‍ട്ട് സെന്ററാണ് (ഐടിസി) ഇക്കാര്യം അറിയിച്ചത്.
ഗന്തൂത്ത് ഏരിയയിലെ ശൈഖ് മക്തൂം ബിന്‍ റാഷിദ് റോഡിലും ശൈഖ് സായിദ് റോഡിന്റെ പ്രവേശന കവാടത്തിലും എക്‌സിറ്റിലുമായി കരാമ ഒയാസിസ് റോഡിലുമാണ് പുതിയ ടോള്‍ പോയിന്റുകള്‍ സ്ഥാപിച്ചിരിക്കുന്നത്. ആഴ്ചയില്‍ ഏഴ് ദിവസവും 24 മണിക്കൂറും ഈ ടോള്‍ ഗേറ്റുകള്‍ പ്രവര്‍ത്തിക്കും. ഓരോ തവണ ഗേറ്റ് കടന്നുപോകുമ്പോഴും വാഹന ഉടമകള്‍ 4 ദിര്‍ഹം വീതം നല്‍കണം. 
മുതിര്‍ന്ന പൗരന്മാര്‍, ഭിന്നശേഷിക്കാര്‍, കുറഞ്ഞ വരുമാനമുള്ള താമസക്കാര്‍, വിരമിച്ച സ്വദേശികള്‍ എന്നിവര്‍ക്ക് നിലവിലുള്ള ഇളവുകള്‍ തുടരും. ഇവര്‍ക്ക് ഒരു വാഹനത്തിന് ഇളവ് ലഭിക്കും.
കരാമ ഒയാസിസ് റോഡിലെ ഗേറ്റ് ഒഴിവാക്കാന്‍ ആഗ്രഹിക്കുന്നവര്‍ക്ക് ശൈഖ് റാഷിദ് ബിന്‍ സഈദ് റോഡ് വഴിയോ അല്‍ ഖലീജ് അല്‍ അറബി സ്ട്രീറ്റ് വഴിയോ യാത്ര ചെയ്യാം. ഗന്തൂത്ത് വഴി പോകുന്നവര്‍ക്ക് ശൈഖ് മുഹമ്മദ് ബിന്‍ റാഷിദ് റോഡ് ഒരു ബദല്‍ മാര്‍ഗമാണ്.
നഗര വിപുലീകരണവും വര്‍ദ്ധിച്ചുവരുന്ന വാഹനങ്ങളുടെ എണ്ണവും കണക്കിലെടുത്താണ് പുതിയ ഗേറ്റുകള്‍ സ്ഥാപിക്കാന്‍ അധികൃതര്‍ തീരുമാനിച്ചത്. തുടര്‍ച്ചയായ പഠനങ്ങളിലൂടെ ഗതാഗത സംവിധാനം കൂടുതല്‍ ഫലപ്രദമാക്കാന്‍ ഇത് സഹായിക്കുമെന്ന് അധികൃതര്‍ വ്യക്തമാക്കി.

Summary: Abu Dhabi will introduce two additional toll gates under the Darb toll system from Monday, with authorities seeking to ease congestion and improve traffic flow across key corridors. The Integrated Transport Centre, part of the Department of Municipalities and Transport, said the new gates will operate around the clock, seven days a week, as part of ongoing efforts to enhance the efficiency of the emirate’s road network.