കൊല്‍ക്കത്ത നൈറ്റ്‌റൈഡേഴ്‌സിനോടേറ്റ 106 റണ്‍സിന്റെ കനത്ത തോല്‍വിക്കു പിന്നാലെ ഡല്‍ഹി ക്യാപ്പിറ്റല്‍സ് ക്യാപ്റ്റന്‍ ഋഷഭ് പന്തിനും ടീം അംഗങ്ങള്‍ക്കും പിഴശിക്ഷ. കുറഞ്ഞ ഓവര്‍ നിരക്കിന്റെ പേരിലാണ് പിഴ ചുമത്തിയിരിക്കുന്നത്. ഇത് രണ്ടാം തവണയാണ് പന്തിന് പിഴ ശിക്ഷ ലഭിക്കുന്നത്. ഡല്‍ഹി ടീം തെറ്റ് ആവര്‍ത്തിച്ചതിനാല്‍ ഇംപാക്റ്റ് പ്ലെയര്‍ അടക്കം പ്ലേയിങ് ഇലവനിലുണ്ടായിരുന്ന എല്ലാവര്‍ക്കുമാണ് പിഴ ചുമത്തിയിരിക്കുന്നത്.

മാച്ച് ഫീയുടെ 25 ശതമാനമോ ആറ് ലക്ഷം രൂപയോ ഏതാണോ കുറവ് അതാണ് ക്യാപ്റ്റന്‍ ഒഴികെയുള്ള ടീം അംഗങ്ങള്‍ പിഴയായി നല്‍കേണ്ടത്. നേരത്തേ ചെന്നൈ സൂപ്പര്‍ കിങ്‌സിനെതിരായ മത്സരത്തിലും കുറഞ്ഞ ഓവര്‍ നിരക്കിന്റെ പേരില്‍ പന്തിന് പിഴയിട്ടിരുന്നു. 12 ലക്ഷം രൂപയാണ് അന്ന് പിഴയിട്ടത്. തെറ്റ് ആവര്‍ത്തിച്ചതോടെയാണ് പിഴ ഇരട്ടിയായത്. ഇനിയും തെറ്റ്ആവര്‍ത്തിച്ചാല്‍ ഒരു മത്സരത്തില്‍ വിലക്ക് നേരിടേണ്ടി വരും.