മനാമ: ഹൈവേകളിലെ എമർജൻസി ലെയ്‌നുകൾ നിയമവിരുദ്ധമായി ഉപയോഗിക്കുന്ന വാഹന ഉടമകൾക്കെതിരേ കർശന നടപടി സ്വീകരിക്കണമെന്ന് പാർലമെന്റ് അംഗങ്ങൾ. ആംബുലൻസുകൾക്കും സിവിൽ ഡിഫൻസ് വാഹനങ്ങൾക്കും ഇനി റോഡുകളിൽ തടസ്സമുണ്ടാകരുതെന്നും ഇതിനായി എ.ഐയുടെ സഹായത്തോടെ കാമറകൾ സ്ഥാപിച്ച് നിരീക്ഷണം ശക്തമാക്കണമെന്നും ആവശ്യപ്പെട്ട് ഡോ. മുനീർ സുരൂറിന്റെ നേതൃത്വത്തിൽ അഞ്ച് എം.പിമാർ അടിയന്തര പ്രമേയം സമർപ്പിച്ചു. പ്രമേയം വിദേശകാര്യ, പ്രതിരോധ, ദേശീയ സുരക്ഷാ സമിതിയുടെ പരിശോധനയ്ക്ക് വിട്ടു.

ALSO READ: സംശയാസ്പദ വസ്തുക്കൾ കണ്ടാൽ തൊടരുത്; ബഹ്റൈൻ പ്രതിരോധ സേനയുടെ കർശന നിർദേശം

നിയമലംഘനം കണ്ടെത്തിയാൽ ഉടനടി മൊബൈൽ സന്ദേശത്തിലൂടെ പിഴ അറിയിപ്പ് നൽകുക, എമർജൻസി ലെയ്‌നിലൂടെ വാഹനം ഓടിക്കുന്നത് അസൗകര്യമാക്കുന്ന തരത്തിൽ 'റംബിൾ സ്ട്രിപ്പുകൾ' പോലുള്ള സംവിധാനങ്ങൾ ഏർപ്പെടുത്തുക തുടങ്ങിയവയാണ് പ്രമേയത്തിലൂടെ അവതരിപ്പിച്ചിരിക്കുന്നത്. തിരക്കുള്ള സമയങ്ങളിൽ കൂടുതൽ പേരും എമർജൻസി ലെയ്‌ൻ ഉപയോഗിക്കുന്നത് പതിവാണെന്ന് ഡോ. മുനീർ സുരൂർ മുന്നറിയിപ്പ് നൽകി. ഇത്തരത്തിലുള്ള നിയമലംഘനങ്ങൾ അപകടങ്ങൾക്ക് കാരണമാകുമെന്നും അദ്ദേഹം ഓർമിപ്പിച്ചു. ബഹ്‌റൈൻ ഇന്റീരിയർ മന്ത്രാലയം ഇതിനകം തന്നെ 500 ഓളം എ.ഐ ക്യാമറകൾ പരീക്ഷണാടിസ്ഥാനത്തിൽ സ്ഥാപിച്ചിട്ടുണ്ട്.

കഴിഞ്ഞ വർഷം റിപ്പോർട്ട് ചെയ്യപ്പെട്ടത് 3.18 ലക്ഷത്തിലധികം ഗതാഗത നിയമലംഘനങ്ങളാണ്. ഈ അപടകങ്ങളിൽ 76 പേർക്ക് ജീവൻ നഷ്ടപ്പെട്ടു. നിലവിലുള്ള നിയമങ്ങൾ നിലനിർത്തിക്കൊണ്ട് തന്നെ നിയമം ലംഘിക്കാൻ കഴിയാത്ത വിധത്തിൽ സാങ്കേതികവും എൻജിനീയറിങുമായ മാറ്റങ്ങൾ കൊണ്ടുവരണമെന്നാണ് എംപിമാരുടെ വാദം. 

Bahraini MPs, led by Dr. Muneer Suroor, have proposed an urgent plan to curb the misuse of highway emergency lanes using AI cameras and innovative road engineering to ensure clear passage for ambulances and first responders.