പീരുമേട്: വിവാഹ സല്‍ക്കാരത്തിനിടെയുണ്ടായ സംഘര്‍ഷത്തില്‍ വരന്റെ സഹോദരീ ഭര്‍ത്താവ് അടക്കം പത്തോളം പേര്‍ക്ക് പരുക്ക്. വണ്ടിപ്പെരിയാര്‍ ഗ്രാമ്പിയില്‍ നടന്ന വിവാഹത്തിനിടെയാണ് സംഘര്‍ഷമുണ്ടായത്. 

വെള്ളിയാഴ്ച്ച ഉച്ചയോടെയായിരുന്നു സംഭവം. കാറ്ററിങ് സ്ഥാപനത്തിലെ ജീവനക്കാരും ബന്ധുക്കളും തമ്മില്‍ ഭക്ഷണം വിളമ്പുന്നതിനെ തുടര്‍ന്ന് തര്‍ക്കമുണ്ടാവുകയും പിന്നീട് കൂട്ടത്തല്ലിലേക്ക് മാറുകയുമായിരുന്നു. നാട്ടുകാരും ബന്ധുക്കളും ഇടപെട്ടാണ് രംഗം ശാന്തമാക്കിയത്. 

വിവാഹം കഴിഞ്ഞ് അവസാന സമയത്താണ് വരന്റെ സഹോദരിയും ഭര്‍ത്താവുമുള്‍പ്പെടെ ഭക്ഷണം കഴിക്കാനെത്തിയത്. ഈ സമയം കേറ്ററിങ് തൊഴിലാളികള്‍ മേശയും കസേരയും വൃത്തിയാക്കുകയായിരുന്നു. ബന്ധുക്കള്‍ ഈ മേശയില്‍ ഇരുന്നപ്പോള്‍ അവിടെ ഭക്ഷണം വിളമ്പാന്‍ കഴിയില്ലെന്നും മറ്റൊരു മേശയിലേക്ക് മാറിയിരിക്കണമെന്നും കേറ്ററിങ് തൊഴിലാളികള്‍ ആവശ്യപ്പെട്ടു. ഇതാണ് സംഘര്‍ഷത്തിലേക്ക് വഴിവെച്ചത്. 

കാറ്ററിങ് സ്ഥാപനത്തിലെ ജീവനക്കാര്‍ വരന്റെ ബന്ധുക്കളെ മര്‍ദ്ദിക്കുകയായിരുന്നുവെന്ന് ഇവര്‍ പൊലിസില്‍ നല്‍കിയ പരാതിയില്‍ പറയുന്നു. പരുക്കേറ്റവരെ ഉടന്‍ തന്നെ വണ്ടിപ്പെരിയാര്‍ കമ്മ്യൂനിറ്റി ഹെല്‍ത്ത് സെന്ററില്‍ പ്രവേശിപ്പിച്ചു. സംഭവത്തില്‍ പൊലിസ് അന്വേഷണം ആരംഭിച്ചു.

Chaos at a wedding reception as catering staff and the groom's relatives clash, leaving ten people injured. Read more about the incident and the cause of the conflict.