തിരുവനന്തപുരം: മുഖ്യമന്ത്രി ചര്‍ച്ചയില്‍ അനിശ്ചിതത്വം തുടരുന്നതിനിടെ കെ.സി വേണുഗോപാലിന്റെ വിക്കിപീഡിയ പേജ് എഡിറ്റ് ചെയ്തതായി കണ്ടെത്തി. വിവിധ സംസ്ഥാനങ്ങളില്‍ കോണ്‍ഗ്രസ് സീറ്റുകള്‍ നഷ്ടപ്പെടാന്‍ കെ.സി വേണുഗോപാല്‍ കാരണക്കാരനായി എന്ന തരത്തിലാണ് വിക്കിപീഡിയയിലെ വിവരങ്ങള്‍ തിരുത്തിയിട്ടുള്ളത്. കെ.സിയുടെ മലയാളം വിക്കിപീഡിയ പേജിലാണ് എഡിറ്റിങ് നടത്തിയിട്ടുള്ളത്. 

കെ.സിയുടെ പേജിന്റെ തുടക്കത്തില്‍ തന്നെ 'കശ്മീര്‍ മുതല്‍ കന്യാകുമാരി വരെയുള്ള ഒത്തിരി കോണ്‍ഗ്രസ് സംസ്ഥാന ഭരണവും, സീറ്റുകളും നഷ്ടപ്പെടാന്‍ ഇദ്ദേഹത്തിന്റെ വീരോചിതമായ ഇടപെടലുണ്ടായി' എന്ന വാചകമാണ് എഡിറ്റ് ചെയ്ത് ചേര്‍ത്തത്. നേരത്തെ നിയമസഭ തെരഞ്ഞെടുപ്പ് വോട്ടിങ് പൂര്‍ത്തിയായതിന് പിന്നാലെ പ്രതിപക്ഷ നേതാവ് വി.ഡി സതീശന്റെ വിക്കിപീഡിയ പേജും എഡിറ്റ് ചെയ്യപ്പെട്ടിരുന്നു. 

വി.ഡി സതീശന്‍ കേരളത്തിന്റെ 13ാം മുഖ്യമന്ത്രി എന്നാണ് എഡിറ്റ് ചെയ്തിരുന്നത്. 2026 മേയ് നാലിന് ചുമതലയേറ്റെന്നും, ഹിസ്റ്ററിയില്‍ വിവരങ്ങള്‍ ചേര്‍ത്തിരുന്നു. പിന്നാലെ വീണ്ടും എഡിറ്റിങ് നടക്കുകയും, പ്രതിപക്ഷ നേതാവെന്ന് മാറ്റുകയും ചെയ്തു.

ALSO READ: ആരാകും മുഖ്യമന്ത്രി? വിഡി സതീശനും, ചെന്നിത്തലയും, സണ്ണി ജോസഫും ഡല്‍ഹിയിലേക്ക്; നാളെ നിര്‍ണായക കൂടിക്കാഴ്ച്ച

സ്വതന്ത്ര വിജ്ഞാന കോശമായ വിക്കിപീഡിയയില്‍ ആര്‍ക്കുവേണമെങ്കിലും എഡിറ്റ് ചെയ്യാനാവും. തെറ്റായ വിവരങ്ങള്‍ ഉള്‍പ്പെടുത്തിയോ, അനുകൂലമായ വിവരങ്ങള്‍ കൂട്ടിച്ചേര്‍ത്തോ വിക്കിപീഡിയ പേജുകള്‍ തിരുത്തപ്പെടാറുണ്ട്.

മുഖ്യമന്ത്രി ചർച്ചയിൽ നിർണായക കൂടിക്കാഴ്ച്ചക്കായി വിഡി സതീശൻ, രമേശ് ചെന്നിത്തല, കെ.പി.സി.സി അധ്യക്ഷൻ സണ്ണി ജോസഫ് എന്നിവർ ഡൽഹിയിലേക്ക്. ഹൈക്കമാൻഡുമായി ചർച്ച നടത്തുന്നതിന് ഇന്ന് രാത്രിയോടെ നേതാക്കൾ ഡൽഹിയിലേക്ക് തിരിക്കുമെന്നാണ് റിപ്പോർട്ട്. എ.ഐ.സി.സി പ്രതിനിധികളുടെ റിപ്പോർട്ടിന്റെ അടിസ്ഥാനത്തിൽ ഡൽഹിയിൽ വെച്ചാണ് ചർച്ചകൾ നടക്കുക. 

സംസ്ഥാനത്തെ സാഹചര്യം സങ്കീർണമാണെന്ന് ഹൈക്കമാൻഡിന് നൽകിയ റിപ്പോർട്ടിൽ എഐസിസി പ്രതിനിധികൾ വ്യക്തമാക്കിയിട്ടുണ്ട്. വി.ഡി സതീശൻ, കെ.സി വേണുഗോപാൽ, രമേശ് ചെന്നിത്തല എന്നിവർ മുഖ്യമന്ത്രി സ്ഥാനത്തേക്ക് ആഗ്രഹം പ്രകടിപ്പിച്ചതോടെയാണ് കോൺഗ്രസിൽ പ്രതിസന്ധി ഉടലെടുത്തത്. നാളെയോടെ ചിത്രം വ്യക്തമാകുമെന്നാണ് പ്രതീക്ഷ.

 മുഖ്യമന്ത്രി പദവിയെച്ചൊല്ലിയുള്ള തർക്കങ്ങൾക്കും വ്യക്തിപൂജകൾക്കും തടയിടാൻ കർശന നടപടിയുമായി കെപിസിസി രം​ഗത്തെത്തി. മുഖ്യമന്ത്രിയെ ഹൈക്കമാൻഡ് തീരുമാനിക്കുമെന്നും നേതാക്കൾക്കായി തെരുവിൽ പ്രകടനങ്ങളോ പരസ്യപ്രസ്താവനകളോ നടത്തുന്നവർക്കെതിരെ വിട്ടുവീഴ്ചയില്ലാത്ത അച്ചടക്ക നടപടി സ്വീകരിക്കുമെന്നും കെപിസിസി പ്രസിഡന്റ് അറിയിച്ചു.

മുഖ്യമന്ത്രി ആരാകണമെന്നത് സംബന്ധിച്ച അന്തിമ തീരുമാനം എഐസിസി നേതൃത്വത്തിന്റേതാണ്. നേതാക്കൾക്കായി വ്യക്തിഗതമായി ഫ്ലക്സുകൾ വെക്കുന്നതും മുദ്രാവാക്യം വിളിച്ചു പ്രകടനം നടത്തുന്നതും അച്ചടക്കലംഘനമായി കണക്കാക്കും. പാർട്ടിയുടെ ഔദ്യോഗിക നിലപാടിന് വിരുദ്ധമായി പ്രവർത്തിക്കുന്നവർക്കെതിരെ പാർട്ടി ഭരണഘടനാനുസൃതമായ നടപടികൾ ഉണ്ടാകുമെന്ന് കെപിസിസി അറിയിച്ചിട്ടുണ്ട്. 

"While uncertainty continues in the Chief Minister's discussion, it has been found that K.C. Venugopal's Wikipedia page was edited."