കോഴിക്കോട്: നിയമസഭാ തെരഞ്ഞെടുപ്പിലെ കൂറ്റന്‍ വിജയത്തിന് പിന്നാലെ കെപിസിസി തലപ്പത്ത് അഴിച്ചുപണിക്ക് കോണ്‍ഗ്രസ്. മേയ് 12ന് നിലവിലെ പ്രസിഡന്റ് സണ്ണി ജോസഫ് പദവിയില്‍ ഒരു വര്‍ഷം പൂര്‍ത്തിയാക്കും. നിയമസഭാ തെരഞ്ഞെടുപ്പില്‍ പേരാവൂരില്‍ നിന്ന് ജയിച്ചതോടെ, വരുന്ന യുഡിഎഫ് മന്ത്രി സഭയില്‍ അദ്ദേഹം ഇടംപിടിച്ചേക്കും. ഈ സാഹചര്യത്തിലാണ് കെപിസിസിക്ക് പുതിയ നാഥനെ തേടി കോണ്‍ഗ്രസ് രംഗത്തിറങ്ങിയത്. 

മുന്‍ യുഡിഎഫ് കണ്‍വീനറായിരുന്ന ബെന്നി ബെഹന്നാന്‍ കെപിസിസി പ്രസിഡന്റ് പദവിയിലേക്ക് എത്തുമെന്നാണ് സൂചന. ഘടകക്ഷി നേതാക്കള്‍ക്കിടയിലുള്ള മികച്ച ബന്ധം അദ്ദേഹത്തിന് മുതല്‍കൂട്ടാവുമെന്നാണ് പ്രതീക്ഷിക്കുന്നത്. ഇക്കാര്യത്തില്‍ അന്തിമ തീരുമാനം ഉടനെത്തും. 

അതേസമയം നിയമസഭാ തെരഞ്ഞെടുപ്പില്‍ ഇത്തവണ മത്സരിച്ച് വിജയിച്ച ഡിസിസി പ്രസിഡന്റുമാരും, ഇതോടൊപ്പം സംഘടനയുടെ ജില്ലാ ചുമതലകള്‍ ഒഴിയും. ഏഴ് ഡിസിസി അധ്യക്ഷന്‍മാരാണ് ഇത്തവണ നിയമസഭയിലേക്ക് മത്സരിച്ചത്. അതില്‍ അഞ്ചുപേര്‍ വിജയിച്ചു. കൊയിലാണ്ടി മണ്ഡലത്തില്‍ നിന്ന് ജനവിധി തേടിയ കോഴിക്കോട് ഡിസിസി പ്രസിഡന്റ് കെ പ്രവീണ്‍ കുമാര്‍, തിരുവനന്തപുരം ഡിസിസി അധ്യക്ഷന്‍ എന്‍. ശക്തന്‍, കോട്ടയത്തെ നാട്ടകം സുരേഷ്, എറണാകുളത്തെ മുഹമ്മദ് ഷിയാസ്, മലപ്പുറം ഡിസിസി അധ്യക്ഷന്‍ വി.എസ് ജോയ് എന്നിവരാണ് ഇത്തവണ നിയമസഭയിലെത്തിയത്. 

വിജയിച്ച ഡിസിസി അധ്യക്ഷന്‍മാര്‍ക്ക് പുറമെ സംഘടന തലത്തിലും സമഗ്രമായ മാറ്റങ്ങളുണ്ടാകുമെന്നാണ് റിപ്പോര്‍ട്ട്.

Congress is reshuffling at the organizational level; KPCC and DCC leaders will be changed."