ഇന്ത്യന്‍ ഫുട്‌ബോള്‍ ടീമിന്റെ പരിശീലകനായി ഇഗോര്‍ സ്റ്റിമാച്ച് തുടരുമെന്ന് റിപ്പോര്‍ട്ട്. ടൈംസ് ഓഫ് ഇന്ത്യ ഉള്‍പ്പെടെയുള്ള മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്. ലോകകപ്പ് യോഗ്യതാ മത്സരത്തില്‍ അഫ്ഗാനിസ്ഥാനെതിരേയുള്ള തോല്‍വിക്ക് ശേഷം സ്റ്റിമാച്ചിനെ പുറത്താക്കണമെന്ന് ശക്തമായ ആവശ്യമുയര്‍ന്നിരുന്നു.

എ.ഐ.എഫ്.എഫ് നിയമിച്ച ടെക്‌നിക്കല്‍ കമ്മിറ്റി സ്റ്റിമാച്ചിനെ പുറത്താക്കാന്‍ ശുപാര്‍ശയും ചെയ്തിരുന്നു. എന്നാല്‍ സ്റ്റിമാച്ചിനെ പുറത്താക്കുകയാണെങ്കില്‍ വന്‍ തുക നഷ്ടപരിഹാരം നല്‍കേണ്ടി വരുമെന്നതിനാല്‍ പരിശീലകനെ തല്‍ക്കാലം നിലനിര്‍ത്താന്‍ തിരുമാനിക്കുകയായിരുന്നു. കുവൈത്തിനും ഖത്തറിനുമെതിരായ ഫിഫ ലോകകപ്പ് യോഗ്യതാ റൗണ്ട് മത്സരങ്ങളില്‍ ശ്രദ്ധ കേന്ദ്രീകരിക്കാന്‍ സ്റ്റിമാച്ചിനോട് ഇന്ത്യന്‍ ഫുട്‌ബോള്‍ ഫെഡറേഷന്‍ നിര്‍ദേശം നല്‍കിയതായാണ് വിവരം.