ബെര്‍ലിന്‍: ഉപരിപഠനത്തിനോ ജോലിക്കോ വേണ്ടി നിലവിലെ സാഹചര്യത്തില്‍ അമേരിക്കയിലേക്ക് പോകാന്‍ താന്‍ സ്വന്തം മക്കളോട് പോലും നിര്‍ദേശിക്കില്ലെന്ന് വ്യക്തമാക്കി ജര്‍മന്‍ ചാന്‍സലര്‍ ഫ്രെഡറിക് മെര്‍സ്. അമേരിക്കയിലെ സാമൂഹിക അന്തരീക്ഷത്തിലെ അതിവേഗ മാറ്റങ്ങളും ഉയര്‍ന്ന വിദ്യാഭ്യാസം നേടിയവര്‍ക്ക് പോലും നേരിടേണ്ടി വരുന്ന തൊഴിലവസര പ്രതിസന്ധിയുമാണ് ഇതിന് കാരണമെന്ന് അദ്ദേഹം പറഞ്ഞു.

വുര്‍സ്ബര്‍ഗില്‍ നടന്ന ഒരു കാത്തലിക് കണ്‍വെന്‍ഷനില്‍ യുവാക്കളോട് സംസാരിക്കവെയാണ് മെര്‍സ് തന്റെ നിലപാട് വ്യക്തമാക്കിയത്. ''ഇന്നത്തെ സാഹചര്യത്തില്‍ എന്റെ മക്കളോട് ഉപരിപഠനത്തിനോ ജോലിക്കോ വേണ്ടി അമേരിക്കയിലേക്ക് പോകാന്‍ ഞാന്‍ നിര്‍ദേശിക്കില്ല. അമേരിക്കയില്‍ മികച്ച വിദ്യാഭ്യാസം നേടിയവര്‍ പോലും ജോലി കണ്ടെത്താന്‍ ബുദ്ധിമുട്ടുകയാണ്,'' എന്നാണ് അദ്ദേഹത്തിന്റെ പ്രതികരണം.

ലോകത്തിന്റെ ഭാവിയെക്കുറിച്ച് അനാവശ്യ ആശങ്ക പുലര്‍ത്തുന്ന പ്രവണത യുവാക്കള്‍ ഒഴിവാക്കണമെന്നും ജര്‍മനിയില്‍ തന്നെ മികച്ച അവസരങ്ങള്‍ ഉണ്ടെന്നും അദ്ദേഹം പറഞ്ഞു. ''യുവാക്കള്‍ക്ക് മികച്ച അവസരങ്ങള്‍ നല്‍കുന്ന രാജ്യങ്ങളില്‍ ഒന്നാണ് ജര്‍മനി,'' എന്നും മെര്‍സ് കൂട്ടിച്ചേര്‍ത്തു.

ഡോണള്‍ഡ് ട്രംപ് വീണ്ടും അമേരിക്കന്‍ പ്രസിഡന്റായതിന് ശേഷം യു.എസും യൂറോപ്യന്‍ സഖ്യകക്ഷികളും തമ്മിലുള്ള ബന്ധത്തില്‍ ഉണ്ടായ അസ്വാരസ്യങ്ങളുടെ പശ്ചാത്തലത്തിലാണ് മെര്‍സിന്റെ പരാമര്‍ശം ശ്രദ്ധ നേടുന്നത്. വ്യാപാര തര്‍ക്കങ്ങള്‍, യുക്രെയ്ന്‍ യുദ്ധം, ഇറാന്‍ വിഷയം എന്നിവയില്‍ ഇരു പക്ഷങ്ങളും തമ്മില്‍ അഭിപ്രായ ഭിന്നത ശക്തമായിട്ടുണ്ട്.

  ALSO READ: ഇസ്രാഈല്‍-ലബനാന്‍ വെടിനിര്‍ത്തല്‍ 45 ദിവസത്തേക്ക് കൂടി നീട്ടി 

കഴിഞ്ഞ മാസം ഇറാന്‍ യുദ്ധത്തില്‍ അമേരിക്ക അപമാനിതരായെന്ന് മെര്‍സ് വിമര്‍ശിച്ചിരുന്നു. ഇതിന് പിന്നാലെ ജര്‍മനിയില്‍ വിന്യസിച്ചിരുന്ന അമേരിക്കന്‍ സൈനികരുടെ ഒരു വിഭാഗത്തെ പിന്‍വലിക്കാന്‍ വാഷിംഗ്ടണ്‍ തീരുമാനിച്ചതായും റിപ്പോര്‍ട്ടുകളുണ്ടായിരുന്നു.

അമേരിക്കയിലേക്കുള്ള പഠന-തൊഴില്‍ കുടിയേറ്റത്തെക്കുറിച്ചുള്ള ജര്‍മന്‍ ചാന്‍സലറുടെ ഈ തുറന്ന നിലപാട് അന്താരാഷ്ട്ര രാഷ്ട്രീയത്തിലും സാമൂഹിക രംഗത്തും വലിയ ചര്‍ച്ചകള്‍ക്ക് വഴിവെച്ചിരിക്കുകയാണ്.