ന്യൂഡല്‍ഹി: ഇന്ധനവില വര്‍ധനവില്‍ പ്രതിഷേധിച്ച് ഡല്‍ഹിയില്‍ ഓട്ടോ-ടാക്സി ഡ്രൈവര്‍മാര്‍ മൂന്നു ദിവസം പണിമുടക്കിലേക്ക്. അഖിലേന്ത്യാ മോട്ടോര്‍ ട്രാന്‍സ്പോര്‍ട്ട് കോണ്‍ഗ്രസിന്റെ നേതൃത്വത്തില്‍ മെയ് 21 മുതല്‍ 23 വരെയാണ് പണിമുടക്ക് പ്രഖ്യാപിച്ചിരിക്കുന്നത്.

ഡല്‍ഹി എന്‍.സി.ആര്‍ മേഖലയിലെ ടാക്സി നിരക്കുകളില്‍ കഴിഞ്ഞ 15 വര്‍ഷമായി മാറ്റമൊന്നും വരുത്തിയിട്ടില്ലെന്ന് യൂണിയനുകള്‍ വ്യക്തമാക്കി. വാഹനങ്ങളുടെ അറ്റകുറ്റപ്പണി, ഇന്‍ഷുറന്‍സ്, ഫിറ്റ്നസ് സര്‍ട്ടിഫിക്കറ്റ്, പെര്‍മിറ്റ് എന്നിവയ്ക്കുള്ള ചെലവുകളും മറ്റ് നിത്യോപയോഗ സാധനങ്ങളുടെ വിലക്കയറ്റവും ഡ്രൈവര്‍മാരുടെ വരുമാനത്തെ വീണ്ടും കുറയ്ക്കുന്നു.

ഒല, ഊബര്‍, റാപ്പിഡോ തുടങ്ങിയ ആപ്പ് അധിഷ്ഠിത കമ്പനികള്‍ തന്നിഷ്ടപ്രകാരമാണ് പ്രവര്‍ത്തിക്കുന്നത്. വര്‍ധിച്ചുവരുന്ന പണപ്പെരുപ്പത്തിനിടയിലും പഴയ നിരക്കില്‍ തന്നെ യാത്രാ ചാര്‍ജ് ഈടാക്കേണ്ടിവരുന്നത് വലിയ പ്രതിസന്ധിയുണ്ടാക്കുന്നതായി സംഘടനകള്‍ ചൂണ്ടിക്കാട്ടി.

സി.എന്‍.ജി, പെട്രോള്‍, ഡീസല്‍ വില വര്‍ധനവ് കാരണം സാധാരണ ഡ്രൈവര്‍മാര്‍ കുടുംബച്ചെലവ് പോലും നടത്താന്‍ ബുദ്ധിമുട്ടുകയാണെന്ന്'ചാലക് ശക്തി യൂണിയന്‍'വൈസ് പ്രസിഡന്റ് അനുജ് കുമാര്‍ പറഞ്ഞു.

അതിനാല്‍ ഡല്‍ഹിയിലെ മറ്റ് സംഘടനകളുമായി ഏകോപിപ്പിച്ച് 'ചാലക് ശക്തി യൂണിയന്‍' മെയ് 21, 22, 23 തീയതികളില്‍ വാഹന പണിമുടക്ക് പ്രഖ്യാപിച്ചിരിക്കുകയാണ്. പണിമുടക്കിനിടെ വാഹനങ്ങള്‍ നിരത്തിലിറക്കരുതെന്ന് ഡ്രൈവര്‍മാരോട് സംഘടനകള്‍ അഭ്യര്‍ഥിച്ചിട്ടുണ്ട്.