ദുബൈ: ദുബൈയിലെ സാലിക് ടോള്‍ ഗേറ്റ് നിരക്കുകള്‍ക്കും ടാഗ് ആക്ടിവേഷന്‍ ചാര്‍ജുകള്‍ക്കും അടുത്ത മാസം മുതല്‍ അഞ്ച് ശതമാനം മൂല്യവര്‍ദ്ധിത നികുതി (വാറ്റ്) ബാധകമാകും. ജൂണ്‍ ഒന്നു മുതല്‍ പുതിയ നിയമം പ്രാബല്യത്തില്‍ വരുമെന്ന് സാലിക് കമ്പനി ഔദ്യോഗികമായി അറിയിച്ചു. ഔദ്യോഗിക എക്‌സ് ഹാന്‍ഡിലിലൂടെയാണ് കമ്പനി ഇക്കാര്യം വ്യക്തമാക്കിയത്.
ടോള്‍ ഗേറ്റുകളിലൂടെ കടന്നുപോകുമ്പോള്‍ ഈടാക്കുന്ന നിരക്കിലും, പുതിയ സാലിക് ടാഗ് സജീവമാക്കുമ്പോഴുള്ള നിരക്കിലുമാണ് അഞ്ച് ശതമാനം വാറ്റ് ഏര്‍പ്പെടുത്തുന്നത്. 
ഇത്തരത്തില്‍ ഉപഭോക്താക്കളില്‍ നിന്ന് ശേഖരിക്കുന്ന വാറ്റ് തുക രാജ്യത്തെ നിലവിലുള്ള നിയമങ്ങളും ചട്ടങ്ങളും അനുസരിച്ച് യു.എ.ഇ ഫെഡറല്‍ ടാക്‌സ് അതോറിറ്റിക്ക് കൈമാറുമെന്നും സാലിക് പ്രസ്താവനയില്‍ അറിയിച്ചു. ദുബൈയിലെ ഇലക്ട്രോണിക് ടോള്‍ ഗേറ്റ് സംവിധാനമായ സാലിക്, വാഹനങ്ങളില്‍ പതിപ്പിക്കുന്ന ആര്‍.എഫ്.ഐ.ഡി ടാഗുകള്‍ വഴിയാണ് പ്രീപെയ്ഡ് അക്കൗണ്ടുകളില്‍ നിന്ന് ടോള്‍ നിരക്കുകള്‍ ഓട്ടോമാറ്റിക് ആയി ഈടാക്കുന്നത്.

Summary: Motorists in Dubai will soon pay Value Added Tax (VAT) on Salik toll gate usage fees and Salik tag activation charges, according to an announcement by the company. Salik said a 5 per cent VAT will be applied effective June 1, 2026, on toll gate usage fees and toll tag activation charges.