കൊച്ചി: കുംഭമേള വൈറല്‍ പെണ്‍കുട്ടിയുടെ വിവാഹവുമായി ബന്ധപ്പെട്ട വിവാദത്തില്‍ ഭര്‍ത്താവ് മുഹമ്മദ് ഫര്‍മാന്റെ മുന്‍കൂര്‍ ജാമ്യാപേക്ഷ ഹൈക്കോടതി തീര്‍പ്പാക്കി. അറസ്റ്റ് ഒരു മാസത്തേക്ക് തടഞ്ഞ കോടതി മുഹമ്മദ് ഫര്‍മാന് അധികാര പരിധിയിലുള്ള കോടതിയെ സമീപിക്കാമെന്നും വ്യക്തമാക്കി. 

മധ്യപ്രദേശിലെ കോടതിയെ സമീപിക്കാമെന്നും അതിനിടയില്‍ അറസ്റ്റ് പാടില്ലെന്നുമാണ് ഹൈക്കോടതി ഉത്തരവിട്ടത്.

പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയി വിവാഹം കഴിച്ചെന്നാണ് മുഹമ്മദ് ഫര്‍മാനെതിരേയുള്ള കേസ്. നിലവില്‍ പെണ്‍കുട്ടിക്ക് 16 വയസ്സ് മാത്രമെന്നാണ് പൊലിസിന്റെ വാദം. ജനന സര്‍ട്ടിഫിക്കറ്റില്‍ തിരുത്തല്‍ വരുത്തിയതായും ജനന രജിസ്ട്രാര്‍ക്ക് തെറ്റായ വിവരങ്ങള്‍ നല്‍കിയതായും പൊലിസ് കോടതിയെ അറിയിച്ചു. സമര്‍പ്പിച്ച സര്‍ട്ടിഫിക്കറ്റിലെയും ആശുപത്രി രേഖകളിലെയും ജനനത്തീയതികളില്‍ പൊരുത്തക്കേടുകളുണ്ടെന്നും പൊലിസ് ചൂണ്ടിക്കാട്ടി.

ഇരുവരും വ്യത്യസ്ത മതവിഭാഗങ്ങളില്‍പ്പെട്ടവരാണ്. ക്ഷേത്രത്തില്‍ നടന്ന വിവാഹം മതാചാരപ്രകാരമല്ല നടന്നതെന്നും അതിനാല്‍ വിവാഹത്തിന് നിയമസാധുതയില്ലെന്നും പൊലിസ് വാദിച്ചു. പിന്നീട് നടത്തിയ രജിസ്റ്റര്‍ വിവാഹവും നിയമപരമായി നിലനില്‍ക്കില്ലെന്നും അറിയിച്ചു.പെണ്‍കുട്ടിക്ക് ആവശ്യമായ സംരക്ഷണം നല്‍കാന്‍ തയ്യാറാണെന്നും മധ്യപ്രദേശ് പൊലിസ് കോടതിയെ അറിയിച്ചിരുന്നു.