പാലക്കാട്: പാലക്കാട്‌ ജില്ലാ ജയിലിനുള്ളിൽ കക്ഷികളും അഭിഭാഷകയും തമ്മിൽ കടുത്ത കൈയാങ്കളി. ജാമ്യം ലഭിച്ച യുവതിയെ ജയിലിൽ നിന്നിറക്കാൻ എത്തിയ വനിതാ അഭിഭാഷകയ്ക്ക് മർദനമേറ്റതായാണ് പരാതി. പ്രമുഖ അഭിഭാഷകയായ മായാ മയൂരയാണ് തനിക്കെതിരെ ആക്രമണമുണ്ടായെന്ന് കാണിച്ച് പൊലിസിൽ പരാതി നൽകിയത്. സംഭവത്തിൽ മലമ്പുഴ പൊലിസ് കേസെടുത്ത് അന്വേഷണം ആരംഭിച്ചു.

ഭർത്താവിനെയും മക്കളെയും ഉപേക്ഷിച്ച് വീട്ടിലെ സ്വർണവുമായി ആൺസുഹൃത്തിനൊപ്പം ഒളിച്ചോടിയെന്ന കേസിൽ റിമാൻഡിലായിരുന്ന ശ്രുതി എന്ന യുവതിക്ക് കഴിഞ്ഞ ചൊവ്വാഴ്ചയാണ് കോടതി ജാമ്യം അനുവദിച്ചത്. തുടർന്ന് കക്ഷിയെ ജയിലിൽ നിന്നും പുറത്തിറക്കാൻ എത്തിയതായിരുന്നു അഡ്വ. മായാ മയൂര.

വീട്ടിലേക്ക് മടങ്ങാൻ വിസമ്മതിച്ചു; ജയിൽ വളപ്പിൽ നാടകീയ രംഗങ്ങൾ

യുവതിയെ ജയിൽ കവാടത്തിന് പുറത്തെത്തിച്ച സമയത്ത് ശ്രുതിയുടെ അമ്മയും കൂടെയുണ്ടായിരുന്ന മറ്റ് രണ്ട് ബന്ധുക്കളും ജയിൽ വളപ്പിൽ കാത്തുനിൽക്കുന്നുണ്ടായിരുന്നു. തങ്ങളോടൊപ്പം വീട്ടിലേക്ക് മടങ്ങിവരണമെന്ന് അമ്മയും ബന്ധുക്കളും ശ്രുതിയോട് ആവശ്യപ്പെട്ടു. എന്നാൽ, കുടുംബത്തോടൊപ്പം പോകാൻ യുവതി വിസമ്മതിച്ചതോടെ ജയിൽ വളപ്പിൽ വെച്ച് ഇരുകൂട്ടരും തമ്മിൽ വാക്കുതർക്കവും കൈയാങ്കളിയുമായി.

അഭിഭാഷകയുടെ പരാതിയിൽ പറയുന്നത്:

തർക്കം രൂക്ഷമായതോടെ മധ്യസ്ഥത വഹിക്കാനും കക്ഷിയെ സംരക്ഷിക്കാനും ശ്രമിച്ച തനിക്കെതിരെ ബന്ധുക്കൾ തിരിയുകയായിരുന്നു. തന്നെ ജയിൽ വളപ്പിലിട്ട് അവർ ക്രൂരമായി മർദ്ദിച്ചു. കൂടാതെ താൻ സഞ്ചരിച്ച കാറിന്റെ ടയറിലെ കാറ്റ് അവർ അഴിച്ചുവിടുകയും ചെയ്തു. സന്ദർശകർക്ക് പ്രവേശിക്കാനുള്ള സമയം പിന്നിട്ടിട്ടും ജയിൽ അധികൃതരുടെ അനുമതിയില്ലാതെ നിയമവിരുദ്ധമായി അകത്തുകയറിയാണ് ബന്ധുക്കൾ അക്രമം അഴിച്ചുവിട്ടത്.

ജയിൽ അധികൃതർ നോക്കിനിന്നുവെന്ന് ആക്ഷേപം; ജില്ലാ ജഡ്ജിക്ക് പരാതി

അക്രമം നടക്കുമ്പോൾ ജയിൽ സുരക്ഷാ ജീവനക്കാരും അധികൃതരും കാര്യമായി ഇടപെടാതെ കാഴ്ചക്കാരായി നോക്കിനിന്നുവെന്നും അഭിഭാഷക പരാതിയിൽ ആരോപിക്കുന്നുണ്ട്. ജയിൽ വളപ്പിൽ വെച്ച് അഭിഭാഷകയ്ക്ക് നേരെ അതിക്രമമുണ്ടായ സംഭവത്തിൽ മലമ്പുഴ പൊലിസിൽ പരാതി നൽകിയതിന് പുറമേ, അഡ്വ. മായാ മയൂര പാലക്കാട് ജില്ലാ ജഡ്ജിക്കും ഔദ്യോഗികമായി പരാതി നൽകിയിട്ടുണ്ട്. സംഭവത്തെക്കുറിച്ച് ജയിൽ വകുപ്പും ആഭ്യന്തര അന്വേഷണം നടത്തിയേക്കുമെന്നാണ് സൂചന.