തിരുവനന്തപുരം: ആശുപത്രിയിലേക്കുള്ള യാത്രാമധ്യേ യുവതിക്ക് 108 ആംബുലന്‍സിനുള്ളില്‍ സുഖപ്രസവം. വര്‍ക്കല കുരക്കണ്ണി സ്വദേശി ഷൈജുവിന്റെ ഭാര്യ അനിത (21) യാണ് ആംബുലന്‍സിനു ഉള്ളില്‍ പെണ്‍കുഞ്ഞിന് ജന്മം നല്‍കിയത്. ശനിയാഴ്ച പുലര്‍ച്ചെ രണ്ടരയോടെ  വേദന അനുഭവപ്പെട്ടതിനെ തുടര്‍ന്ന്   ബന്ധുക്കള്‍ 108 ആംബുലന്‍സിന്റെ സഹായം തേടുകയായിരുന്നു. തുടര്‍ന്ന് വര്‍ക്കല കേന്ദ്രീകരിച്ച് സര്‍വീസ് നടത്തുന്ന 108 ആംബുലന്‍സ് എത്തി  ഇ.എം.ടി ഷെഫീക്കിന്റെ പരിശോധനയില്‍ അനിതയെ എസ്.എ.ടി ആശുപത്രിയിലേക്ക് മാറ്റാന്‍ തീരുമാനിച്ചു. എസ്.എ.ടിയിലേക്കുള്ള യാത്രാ മധ്യേ കല്ലമ്പലം ജങ്ഷനു സമീപത്തു വെച്ചാണ്  യുവതി കുഞ്ഞിന് ജന്മം നല്‍കിയത്.  പ്രഥമ ശുശ്രൂഷക്കു ശേഷം അമ്മയെയും കുഞ്ഞിനെയും വര്‍ക്കല താലൂക്ക് ആശുപത്രിയില്‍ പ്രവേശിപ്പിച്ചു.രണ്ടുപേരും സുഖമായിരിക്കുന്നതായി ആശുപത്രി അധികൃതര്‍ അറിയിച്ചു.
ജിതിന്‍ എ.എസായിരുന്നു ആംബുലന്‍സ് ഡ്രൈവര്‍. ഈ വര്‍ഷം  ഈ ആംബുലന്‍സില്‍ നടക്കുന്ന  നാലാമത്തെ പ്രസവമാണിത്.