ന്യൂഡല്‍ഹി: രാജ്യത്തെ മുസ്‌ലിംകളുടെ സാമൂഹിക-രാഷ്ട്രീയ പാര്‍ശ്വവല്‍ക്കരണം, ഭരണഘടനാ അവകാശങ്ങളുടെ ലംഘനം, വിദ്വേഷ പ്രചാരണങ്ങള്‍, സാമുദായിക സൗഹാര്‍ദം തകര്‍ക്കുന്ന നടപടികള്‍, മുസ്‌ലിംകളുടെ ജീവനും സ്വത്തിനും നേരെയുള്ള ആക്രമണങ്ങള്‍, പള്ളികളും മദ്റസകളും പൊളിച്ചുനീക്കല്‍ തുടങ്ങിയ വിഷയങ്ങള്‍ക്കെതിരേ രാജ്യവ്യാപക പ്രക്ഷോഭം ആരംഭിക്കാന്‍ ഓള്‍ ഇന്ത്യാ മുസ്‌ലിം പഴ്സണല്‍ ലോ ബോര്‍ഡ്. ജനാധിപത്യത്തെയും നീതിയെയും സമാധാനത്തെയും പിന്തുണയ്ക്കുന്ന വിവിധ വിഭാഗങ്ങളെ ഒരുമിപ്പിച്ചുകൊണ്ടായിരിക്കും ഈ പ്രക്ഷോഭം സംഘടിപ്പിക്കുകയെന്ന് ബോര്‍ഡ് ദേശീയ വക്താവ് ഡോ. എസ്.ക്യു.ആര്‍. ഇല്യാസ് അറിയിച്ചു. 

മുസ്‌ലിം സമൂഹത്തിന്റെ അവകാശങ്ങള്‍ സംരക്ഷിക്കുന്നതെന്നത് ഒരു സമുദായത്തിന്റെ മാത്രം പ്രശ്നമല്ലെന്നും, രാജ്യത്തിന്റെ ജനാധിപത്യ ഘടനയെയും സാമൂഹിക ഐക്യത്തെയും വികസന പ്രക്രിയയെയും ബാധിക്കുന്ന ദേശീയ വിഷയമാണെന്നും ബോര്‍ഡ് വ്യക്തമാക്കി. രാജ്യത്തെ നിലവിലെ രാഷ്ട്രീയ-സാമൂഹിക സാഹചര്യവും മുസ്‌ലിം സമൂഹം നേരിടുന്ന പ്രശ്നങ്ങളും ബോര്‍ഡിന്റെ എക്സിക്യൂട്ടീവ് യോഗം വിശദമായി വിലയിരുത്തി. മുസ്‌ലിം സമൂഹത്തിനെതിരായ ആക്രമണങ്ങളില്‍ ഗുരുതര ആശങ്ക രേഖപ്പെടുത്തി. 

ALSO READ: 'പരീക്ഷാ നടത്തിപ്പുകാര്‍ക്ക് രണ്ടാം അവസരം ലഭിച്ചപ്പോള്‍ വിദ്യാര്‍ഥികള്‍ക്ക് എന്തുകൊണ്ട് ലഭിച്ചില്ല?': നീറ്റ്‌യുജി പുനഃപരീക്ഷയെ ചൊല്ലി പുതിയ വിവാദം

ബിജെപി ഭരിക്കുന്ന സംസ്ഥാനങ്ങളില്‍ മുസ്‌ലിംകള്‍ക്കെതിരായ ആള്‍ക്കൂട്ട ആക്രമണങ്ങള്‍, പള്ളികളും മദ്റസകളും പൊളിച്ചുനീക്കല്‍, വീടുകളും കെട്ടിടങ്ങളും ബുള്‍ഡോസര്‍ ഉപയോഗിച്ച് തകര്‍ക്കല്‍, സര്‍ക്കാര്‍ പരിപാടികളിലും സ്‌കൂളുകളിലും സര്‍ക്കാര്‍ സഹായം ലഭിക്കുന്ന മദ്റസകളിലും വന്ദേ മാതരം നിര്‍ബന്ധമാക്കാനുള്ള ശ്രമങ്ങള്‍, വിവിധ സംസ്ഥാനങ്ങളില്‍ ഏകീകൃത സിവില്‍ കോഡ് നടപ്പാക്കാനുള്ള നീക്കങ്ങള്‍, കൂടാതെ മധ്യപ്രദേശ് ഹൈക്കോടതിയുടെ കമാല്‍ മൗലാ മസ്ജിദ് കേസിലെ വിധി തുടങ്ങിയ വിഷയങ്ങളാണ് യോഗത്തില്‍ പ്രധാനമായും ചര്‍ച്ചയായത്. 

രാജ്യത്ത് വിദ്വേഷവും മതധ്രുവീകരണവും ക്രമബദ്ധമായി വളര്‍ത്തുന്ന സാഹചര്യം രൂപപ്പെട്ടിരിക്കുകയാണ്. മുസ്‌ലിംകളുടെ ജീവന്‍, സ്വത്ത്, മതസ്വാതന്ത്ര്യം, വ്യക്തിനിയമങ്ങള്‍, ഭരണഘടന ഉറപ്പുനല്‍കുന്ന അടിസ്ഥാനാവകാശങ്ങള്‍ എന്നിവ തുടര്‍ച്ചയായ സമ്മര്‍ദത്തിനും ആക്രമണങ്ങള്‍ക്കും വിധേയമാകുകയാണെന്ന് യോഗം വിലയിരുത്തി. മതവിദ്വേഷ പ്രസംഗങ്ങള്‍ക്കും പ്രകോപനങ്ങള്‍ക്കുമെതിരേ ഫലപ്രദമായ നിയമനടപടികള്‍ ഉണ്ടാകുന്നില്ലെന്നും, മറിച്ച് ഭരണകക്ഷിയിലെ ചില മുതിര്‍ന്ന നേതാക്കള്‍ തന്നെ ഇത്തരം അന്തരീക്ഷം സൃഷ്ടിക്കുന്നതില്‍ പങ്കുവഹിക്കുന്നു. മുസ്‌ലിം സമൂഹത്തിന്റെ ജീവനും സ്വത്തിനും മതവിശ്വാസങ്ങള്‍ക്കും നേരെ നടക്കുന്ന ആക്രമണങ്ങളില്‍ മതനിരപേക്ഷ രാഷ്ട്രീയ പാര്‍ട്ടികള്‍ പോലും മൗനം പാലിക്കുന്നതായി യോഗം വിമര്‍ശിച്ചു.

the all india muslim personal law board has announced a nationwide protest against alleged anti muslim actions including bulldozer politics and compulsory vande mataram policies across india.