കോഴിക്കോട്: ട്രെയിനില്‍ നടത്തിയ പരിശോധനയില്‍ 60 കിലോയിലേറെ തൂക്കം വരുന്ന പുകയിലപ്പൊടിയും ഹാന്‍സ് പാക്കറ്റുകളും പിടികൂടി. കമ്പോളത്തില്‍ 80,000 രൂപയോളം വിലമതിക്കുന്നവയാണ് ഉല്‍പന്നങ്ങള്‍.
കോഴിക്കോട് റെയില്‍വേ സ്റ്റേഷനിലെ പ്ലാറ്റ്‌ഫോമുകളിലും ട്രെയിനുകളിലും റെയില്‍വേ പ്രൊട്ടക്ഷന്‍ ഫോഴ്‌സും റെയില്‍വേ പൊലിസും സംയുക്തമായി നടത്തിയ പരിശോധനയിലാണ് പുകയില ഉല്‍പന്നങ്ങള്‍ പിടികൂടിയത്.
മംഗളൂരു-കോയമ്പത്തൂര്‍ ഫാസ്റ്റ് പാസഞ്ചര്‍ ട്രെയിനില്‍ പുറകിലെ കോച്ചില്‍ ചാക്ക് കെട്ടുകളിലായി അടുക്കിവച്ച നിലയിലാണ് ഹാന്‍സ് പാക്കറ്റുകളും രണ്ടു ചാക്കുകളില്‍ നിറയെ പുകയിലപ്പൊടിയും കണ്ടെത്തിയത്. ഓണത്തിന് രൂപീകരിച്ച സ്‌പെഷല്‍ പട്രോളിങ്ങിന്റെ ഭാഗമായാണ് റെയ്ഡ് നടത്തിയത്. ചാക്ക് കെട്ടുകളില്‍ പുകയിലയുടെ ഗന്ധം വരാതിരിക്കുന്നതിന് കര്‍പൂരപ്പൊടിയും പൗഡറും വിതറിയിരുന്നു. കോഴിക്കോട് റെയില്‍വേ പൊലിസ് സബ്ഇന്‍സ്‌പെക്ടര്‍ ബി.കെ സിജുവിന്റെ നേതൃത്വത്തില്‍ നടത്തിയ പരിശോക്ക്യ്ക്ക് കോണ്‍സ്റ്റബിള്‍മാരായ പ്രവീണ്‍, കെ.പി അനില്‍, എ.എസ്.ഐ ശശിധരന്‍ നേതൃത്വം നല്‍കി.