റിയാദ്: സൗദി അറേബ്യയിലെ സ്വകാര്യ മേഖലയിലെ 46 എഞ്ചിനീയറിങ് തസ്തികകളില്‍ 30 ശതമാനം സൗദിവത്കരണം (Saudization) നിര്‍ബന്ധമാക്കുന്ന പുതിയ തീരുമാനം ചൊവ്വാഴ്ച മുതല്‍ പ്രാബല്യത്തില്‍ വന്നു. മാനവവിഭവശേഷിസാമൂഹിക വികസന മന്ത്രാലയം മുനിസിപ്പാലിറ്റീസ് ആന്‍ഡ് ഹൗസിങ് മന്ത്രാലയവുമായി സഹകരിച്ചാണ് നടപടി നടപ്പാക്കിയത്.
സംബന്ധപ്പെട്ട എഞ്ചിനീയറിങ് തസ്തികകളില്‍ അഞ്ചോ അതിലധികമോ ജീവനക്കാരെ നിയമിച്ച സ്വകാര്യ സ്ഥാപനങ്ങള്‍ക്കാണ് പുതിയ വ്യവസ്ഥ ബാധകമാകുന്നത്. സൗദി കൗണ്‍സില്‍ ഓഫ് എഞ്ചിനീയേഴ്‌സിന്റെ പ്രൊഫഷണല്‍ അംഗീകാരം ആവശ്യമായ 46 എഞ്ചിനീയറിങ് വിഭാഗങ്ങളാണ് ഇതില്‍ ഉള്‍പ്പെടുത്തിയിരിക്കുന്നത്.

ആര്‍ക്കിടെക്ചര്‍, വൈദ്യുതി ഉല്‍പാദനം, ഇന്‍ഡസ്ട്രിയല്‍, ഇലക്ട്രോണിക്‌സ്, ഓട്ടോമൊബൈല്‍, മറൈന്‍, എയ്‌റോസ്‌പേസ് തുടങ്ങി വിവിധ എഞ്ചിനീയറിങ് മേഖലകളിലെ തസ്തികകളാണ് പുതിയ സൗദിവത്കരണ നയത്തിന്റെ പരിധിയില്‍ വരുന്നത്.

പുതിയ നിയമം സ്ഥാപനങ്ങള്‍ പാലിക്കുന്നുണ്ടോയെന്ന് പരിശോധിക്കാന്‍ മന്ത്രാലയത്തിന്റെ പരിശോധനാ സംഘങ്ങള്‍ നിരീക്ഷണം ആരംഭിച്ചതായി അധികൃതര്‍ അറിയിച്ചു. അനുവദിച്ചിരിക്കുന്ന സാവകാശകാലാവധി അവസാനിച്ച ശേഷം നിയമലംഘനം നടത്തുന്ന സ്ഥാപനങ്ങള്‍ക്കെതിരെ നിയമാനുസൃത നടപടികളും പിഴയും സ്വീകരിക്കും.

രാജ്യത്തെ സ്വദേശി എഞ്ചിനീയര്‍മാര്‍ക്ക് കൂടുതല്‍ തൊഴിലവസരങ്ങള്‍ സൃഷ്ടിക്കുകയും തൊഴില്‍വിപണിയുടെ ആവശ്യങ്ങള്‍ക്കനുസരിച്ച് ദേശീയ പ്രതിഭകളെ പ്രോത്സാഹിപ്പിക്കുകയും ചെയ്യുകയെന്ന ലക്ഷ്യത്തോടെയാണ് പുതിയ തീരുമാനം നടപ്പാക്കിയതെന്ന് മന്ത്രാലയം വ്യക്തമാക്കി.

English Sumamry:  Saudi Arabia has raised Saudization rate in engineering professions in the private sector to 30 percent effective from Tuesday, June 30, 2026. The Ministry of Human Resources and Social Development (HRSD), in cooperation with the Ministry of Municipalities and Housing, announced the implementation of this decision, which is applicable to establishments employing five or more workers in the covered professions.