റാഞ്ചി: ജാര്‍ഖണ്ഡില്‍ മൂന്ന് വയസ്സുകാരിയെ പീഡിപ്പിച്ച കേസ് പൊലിസിനെ അറിയിക്കാതെ പണം നല്‍കി ഒത്തുതീര്‍പ്പാക്കാന്‍ ഗ്രാമപഞ്ചായത്തിന്റെ (ഖാപ് പഞ്ചായത്ത്) ഇടപെടല്‍. കേസ് ഒതുക്കാന്‍ പ്രതിക്ക് ചുമത്തിയ പിഴത്തുക ഉപയോഗിച്ച് ഗ്രാമവാസികള്‍ മദ്യസല്‍ക്കാരം നടത്തുന്നതിനിടെ പൊലിസ് സംഘം സ്ഥലത്തെത്തി പ്രതിയെ കസ്റ്റഡിയിലെടുത്തു. ജാര്‍ഖണ്ഡിലെ ഗുംല ജില്ലയില്‍ കഴിഞ്ഞ ശനിയാഴ്ച വൈകുന്നേരമാണ് നാടിനെ നടുക്കിയ ഈ സംഭവം നടന്നത്. സുനില്‍ ലൊഹാര എന്ന പ്രതിക്ക് പഞ്ചായത്ത് ഒരു ലക്ഷം രൂപയാണ് പിഴ ചുമത്തിയത്.

വീട്ടില്‍ കളിച്ചു കൊണ്ടിരിക്കുകയായിരുന്ന പെണ്‍കുട്ടിയെ സുനില്‍ ലൊഹാര കളിപ്പിക്കാനെന്ന വ്യാജേന മറ്റൊരു മുറിയിലേക്ക് കൂട്ടിക്കൊണ്ടുപോയി ക്രൂരമായി പീഡിപ്പിക്കുകയായിരുന്നു. കുട്ടിയുടെ നിലവിളി കേട്ട് അമ്മ ഓടിയെത്തിയപ്പോഴാണ് പീഡനവിവരം പുറത്തറിയുന്നത്. എന്നാല്‍ ക്രൂരമായ ഈ പോക്‌സോ കുറ്റം പൊലിസില്‍ അറിയിക്കുന്നതിന് പകരം അടിയന്തര യോഗം വിളിച്ച് പ്രതിയില്‍ നിന്ന് ഒരു ലക്ഷം രൂപ നഷ്ടപരിഹാരം ഈടാക്കി കേസ് ഒതുക്കാനാണ് പഞ്ചായത്ത് ഭാരവാഹികള്‍ ശ്രമിച്ചത്.

വിവരമറിഞ്ഞ് പൊലിസ് സംഭവസ്ഥലത്ത് എത്തുമ്പോള്‍, പിഴത്തുകയില്‍ നിന്ന് അഡ്വാന്‍സായി വാങ്ങിയ 2000 രൂപ ഉപയോഗിച്ച് ഗ്രാമവാസികള്‍ മദ്യവും മാംസാഹാരവും വാങ്ങി സല്‍ക്കാരം നടത്തുന്ന കാഴ്ച്ചയാണ് കണ്ടത്. തുടര്‍ന്ന് പൊലിസ് പ്രതിയായ സുനില്‍ ലൊഹാരയെ അറസ്റ്റ് ചെയ്യുകയും കുട്ടിയുടെ അമ്മയുടെ മൊഴി പ്രകാരം കേസ് രജിസ്റ്റര്‍ ചെയ്യുകയും ചെയ്തു. അതേസമയം, ഈ ഒത്തുതീര്‍പ്പ് ചര്‍ച്ചകളെക്കുറിച്ച് തനിക്ക് യാതൊരു അറിവുമില്ലെന്നാണ് പഞ്ചായത്ത് പ്രസിഡന്റ് ലോഡോ എക്കന്‍ പ്രതികരിച്ചത്. സംഭവത്തില്‍ കൂടുതല്‍ അന്വേഷണം പുരോഗമിക്കുകയാണെന്ന് പൊലിസ് അറിയിച്ചു.

The Jharkhand police arrested a man for abusing a three-year-old girl, after foiling a Khap Panchayat’s illegal attempt to settle the case for a one-lakh rupee fine, which the villagers were already using to fund a liquor party.