ദുബൈ: യുഎഇയിലെ ഇന്ത്യൻ പാസ്‌പോർട്ട്, കോൺസുലാർ സേവനങ്ങൾ കൂടുതൽ ലളിതവും ജനകീയവുമാക്കാൻ നിർണായക തീരുമാനവുമായി ഇന്ത്യൻ എംബസി. നിശ്ചയദാർഢ്യമുള്ളവർക്ക് (PoD), 60 വയസ്സിന് മുകളിലുള്ള മുതിർന്ന പൗരന്മാർ, നവജാത ശിശുക്കളുടെ മാതാപിതാക്കൾ എന്നിവർക്ക് മുൻകൂട്ടി അപ്പോയിന്റ്മെന്റ് എടുക്കാതെ തന്നെ ഏത് കോൺസുലാർ ആപ്ലിക്കേഷൻ സെന്ററുകളിലേക്കും (ICAC) നേരിട്ടെത്തി (Walk-in) സേവനം കൈപ്പറ്റാമെന്ന് യുഎഇയിലെ ഇന്ത്യൻ അംബാസഡർ ഡോ. ദീപക് മിത്തൽ പ്രഖ്യാപിച്ചു.

ഷാർജ ഇന്ത്യൻ അസോസിയേഷൻ സംഘടിപ്പിച്ച സെഷനിലാണ് അദ്ദേഹം ഇക്കാര്യം അറിയിച്ചത്. ഈ വിഭാഗത്തിൽപ്പെടുന്നവർക്ക് സാധാരണ ക്യൂ ഒഴിവാക്കി മുൻഗണനാ അടിസ്ഥാനത്തിൽ സേവനം നൽകാൻ പ്രത്യേക കൗണ്ടറുകളും സജ്ജീകരിക്കും.

അൽഹിന്ദ് ട്രാവൽസ് കേന്ദ്രങ്ങൾ പ്രവർത്തനം ആരംഭിച്ചു

കേരളം ആസ്ഥാനമായുള്ള അൽഹിന്ദ് ടൂഴ്‌സ് ആൻഡ് ട്രാവൽസിന്റെ നേതൃത്വത്തിൽ യുഎഇയിലുടനീളമുള്ള 16 കേന്ദ്രങ്ങളിൽ പുതിയ കോൺസുലാർ ആപ്ലിക്കേഷൻ സെന്ററുകൾ (ICAC) പ്രവർത്തനം ആരംഭിച്ചു.

യുഡബ്ല്യു മാളിലെ ഫ്ലാഗ്ഷിപ്പ് സെന്ററിൽ 70-ലധികം കൗണ്ടറുകളാണുള്ളത്. ഇതിൽ 3 കൗണ്ടറുകൾ പോഡ്‌സ് ഡെലിവറി സെന്ററുകൾക്കായി പ്രത്യേകം നീക്കിവെച്ചിരിക്കുന്നു. പാസ്‌പോർട്ട് പുതുക്കൽ, ഡോക്യുമെന്റ് അറ്റസ്റ്റേഷൻ, വിസ സേവനങ്ങൾ, ഒസിഐ (OCI) സേവനങ്ങൾ എന്നിവ ഇവിടെ ലഭ്യമാണ്.

മുൻഗണനാ വിഭാഗത്തിൽപ്പെടാത്ത സാധാരണ അപേക്ഷകർ consularsevainuae.com എന്ന ഔദ്യോഗിക പോർട്ടൽ വഴി അപ്പോയിന്റ്മെന്റ് എടുക്കേണ്ടത് നിർബന്ധമാണ്. ദിവസവും രാവിലെ 9-നും രാത്രി 9-നും സ്ലോട്ടുകൾ ലഭ്യമാകും. അപ്പോയിന്റ്മെന്റ് സമയത്തിന് 15 മിനിറ്റ് മുമ്പ് മാത്രമേ കേന്ദ്രത്തിലേക്ക് പ്രവേശനം അനുവദിക്കൂ.

നിയമപോരാട്ടത്തിനൊടുവിൽ സേവനാരംഭം

2025 നവംബറിലെ ടെൻഡറിലൂടെയാണ് അൽഹിന്ദിന് ഈ കരാർ ലഭിച്ചത്. ചില കമ്പനികൾ നൽകിയ നിയമതടസ്സങ്ങൾ കാരണം ഡൽഹി ഹൈക്കോടതിയിൽ കേസ് നിലനിന്നിരുന്നതിനാലാണ് സേവനം ആരംഭിക്കാൻ വൈകിയത്. എന്നാൽ ഇടക്കാല കാലയളവിൽ ഉചിതമായ സേവന ദാതാവിനെ അനുവദിക്കാൻ സുപ്രീം കോടതി ഇന്ത്യൻ മിഷനുകൾക്ക് അനുമതി നൽകിയതോടെയാണ് ആപ്ലിക്കേഷൻ സെന്ററുകൾ യാഥാർത്ഥ്യമായത്.

കഴിഞ്ഞ 14 വർഷമായി ഈ ടെൻഡറിൽ പങ്കെടക്കുന്നുണ്ടെന്നും ഇതാദ്യമായാണ് വിജയിക്കുന്നതെന്നും അൽഹിന്ദ് ചെയർമാൻ മുഹമ്മദ് ഹാരിസ് ടി. പറഞ്ഞു. ശ്രീലങ്കയിലും സമാനമായ കോൺസുലാർ സേവനങ്ങൾ നൽകാനുള്ള കരാർ അൽഹിന്ദ് സ്വന്തമാക്കിയിട്ടുണ്ട്.

ALSO READ: അല്‍ ദഫ്‌റയിലേക്ക് ഇത്തിഹാദ് റെയില്‍ സര്‍വീസ് വിപുലീകരണം; മദീനത് സായിദ്, ലിവ സ്റ്റേഷനുകള്‍ നവംബര്‍ 30ന് തുറക്കും

Indian passport services in the UAE are now more convenient, with walk-in access available for senior citizens and parents of newborns, eliminating appointment requirements for eligible applicants.