ന്യുഡല്‍ഹി: സോഷ്യല്‍ മീഡിയയിലൂടെ തനിക്കും കുടുംബത്തിനുമെതിരേ നടക്കുന്ന വ്യാജ ആരോപണങ്ങള്‍ക്കെതിരേ ഹൈക്കോടതിയില്‍ മാനനഷ്ടക്കേസ് ഫയല്‍ ചെയ്ത് കേന്ദ്രമന്ത്രി നിതിന്‍ ഗഡ്ക്കരി. കേന്ദ്ര സര്‍ക്കാരിന്റെ ഇ-20 പെട്രോള്‍ പദ്ധതിയിലൂടെ അദ്ദേഹം വന്‍ ലാഭമുണ്ടാക്കിയെന്ന രീതിയില്‍ പ്രചരിക്കുന്ന ഡീപ്ഫേക്ക് വീഡിയോകള്‍ക്കും സോഷ്യല്‍ മീഡിയ പോസ്റ്റുകള്‍ക്കുമെതിരെയാണ് നിയമനടപടി.

കേന്ദ്ര സര്‍ക്കാരിന്റെ ഇ20 (20 ശതമാനം എഥനോള്‍ ബ്ലെന്‍ഡഡ് പെട്രോള്‍) നയത്തില്‍ നിന്ന് തനിക്കും കുടുംബത്തിനും കോടികള്‍ സാമ്പത്തിക നേട്ടമുണ്ടായെന്ന് തെറ്റായതും അപകീര്‍ത്തികരവുമായ പോസ്റ്റുകള്‍ ഓണ്‍ലൈനില്‍ പ്രചരിപ്പിച്ചതായി ഗഡ്കരി ഹരജിയില്‍ ആരോപിച്ചു. തന്റെ വകുപ്പിന് കീഴില്‍ വരുന്നതല്ല എഥനോള്‍ പോളിസിയെന്നും ഗഡ്കരി വ്യക്തമാക്കി. എഥനോള്‍ ബ്ലെന്‍ഡിംഗ് നയം കൈകാര്യം ചെയ്യുന്നത് പെട്രോളിയം, പ്രകൃതിവാതക മന്ത്രാലയമാണ്, അല്ലാതെ ഗഡ്കരിയുടെ നേതൃത്വത്തിലുള്ള റോഡ് ഗതാഗത, ഹൈവേ മന്ത്രാലയമല്ലെന്നും ഹരജിയില്‍ വ്യക്തമാക്കിയിട്ടുണ്ട്. 

അപകീര്‍ത്തികരമായ കാര്യങ്ങള്‍ പ്രചരിപ്പിക്കുന്നതിനെതിരെയും അനുമതിയില്ലാതെ തന്റെ മുഖവും ശബ്ദവും എഐ സാങ്കേതികവിദ്യയിലൂടെ ദുരുപയോഗം ചെയ്യുന്നത് വിലക്കണമെന്നും ഗഡ്കരി ആവശ്യപ്പെട്ടിട്ടുണ്ട്.

ഇ 20 പെട്രോള്‍

ഗുണങ്ങൾ

• പെട്രോളിന്റെ ഉപയോഗം കുറയ്ക്കുന്നു.
• ഇറക്കുമതി ചെയ്യുന്ന ക്രൂഡ് ഓയിലിനെ ആശ്രയിക്കുന്നത് കുറയ്ക്കാൻ സഹായിക്കുന്നു.
• കാർബൺ മോണോക്സൈഡ് പോലുള്ള ചില മലിനീകരണങ്ങൾ കുറയ്ക്കാൻ സഹായിക്കും.
• കരിമ്പ്, ചോളം തുടങ്ങിയ കാർഷിക വിളകളിൽ നിന്ന് എഥനോൾ ഉൽപാദിപ്പിക്കാൻ കഴിയുന്നതിനാൽ കർഷകർക്ക് പ്രയോജനം ലഭിക്കാം.

പരിമിതികൾ

• ഉയർന്ന എഥനോൾ മിശ്രിതം (ഉദാ: E20) എല്ലാ പഴയ വാഹനങ്ങൾക്കും അനുയോജ്യമാകണമെന്നില്ല.
• ഇന്ധനക്ഷമത (മൈലേജ്) അല്പം കുറയാൻ സാധ്യതയുണ്ട്, കാരണം എഥനോളിന്റെ ഊർജസാന്ദ്രത പെട്രോളിനേക്കാൾ കുറവാണ്.
• വാഹന നിർമ്മാതാവ് ശുപാർശ ചെയ്യുന്ന ഇന്ധന തരം ഉപയോഗിക്കുന്നത് പ്രധാനമാണ്.