കുമളി: വന്‍നഗരങ്ങളില്‍ വര്‍ഷത്തില്‍ നടക്കാറുള്ള റേവ് പാര്‍ട്ടി എന്നറിയപ്പെടുന്ന രീതിയില്‍ കഞ്ചാവുള്‍പ്പടെയുള്ള ലഹരി വസ്തുക്കള്‍ ഉപയോഗിച്ചുകൊണ്ടിരുന്ന രണ്ട് വിദ്യാര്‍ഥികള്‍ ഉള്‍പ്പടെ മൂന്ന് പേര്‍ എക്‌സൈസ് പിടിയിലായി. നടത്തിപ്പ്കാരനായ വീട്ട് ഉടമ ഓടി രക്ഷപ്പെട്ടു.
കുമളി സ്വദേശികളായ എണ്ണിക്കാട്ടില്‍ സൂരജ് (18), പാറയില്‍ നവീന്‍ ബാബു (22) എന്നീ വിദ്യാര്‍ഥികളും കണമ്പില്‍ അനീഷ് (22), പെയിന്റിംഗ് തൊഴിലാളിയുമാണ് പിടിയിലായത് .വീട്ടില്‍ നിന്നും  250 ഗ്രാം കഞ്ചാവും, കഞ്ചാവ് വലിക്കാന്‍ ഉപയോഗിക്കുന്ന പൈപ്പ്,  നഞ്ചക്ക് എന്നിവ കണ്ടെടുത്തു.
കുമളി രണ്ടാം മൈല്‍ കോളനിയില്‍ സ്വകാര്യ വ്യക്തിയുടെ ആളൊഴിഞ്ഞ വീട്ടിലാണ് കഞ്ചാവ് വലിക്കാന്‍ അവസരം ഒരുക്കിയിരുന്നത്.വീടുകള്‍ കേന്ദ്രീകരിച്ച് മയക്ക് മരുന്ന് ഉള്‍പ്പടെയുള്ള ലഹരി വസ്തുകള്‍ ഉപയോഗിക്കുന്നതിന് അവസരം നല്‍കുന്നതായി ശ്രദ്ധയില്‍പ്പെട്ടതായും, പതിനഞ്ച് ദിവസമായി നടത്തിവന്നിരുന്ന നിരീക്ഷണത്തിനൊടുവിലാണ് ഇവരെ പിടികൂടാനായതെന്നും എക്‌സൈസ് ഉദ്യോഗസ്ഥര്‍ പറഞ്ഞു.  എക്‌സൈസ് ഇന്‍സ്‌പെക്ടര്‍ സി.കെ.സുനില്‍ രാജ്, സിവില്‍ ഓഫീസര്‍ രാജ് കുമാര്‍, അനീഷ്, ജോബി തോമസ്, സെറ്റെല്ല ഉമ്മന്‍, ശ്രീദേവി, ഹാപ്പി മോന്‍ എന്നിവരുടെ നേതൃത്വത്തിലാണ് പ്രതികളെ പിടികൂടിയത്. വിദ്യാര്‍ഥികള്‍ കഞ്ചാവ് ഉപയോഗിക്കാന്‍ അവസരമൊരുക്കിയ ഓടിയൊളിച്ച വീട്ട് ഉടമയെ എത്രയും വേഗം പിടികൂടുമെന്ന് ഉദ്യോഗസ്ഥര്‍ പറഞ്ഞു.