കോവളം: ആഴിമല ക്ഷേത്രത്തിന് സമീപത്ത്  തിരയില്‍പ്പെട്ട് കാണാതായ രണ്ട് അന്യസംസ്ഥാന തൊഴിലാളികളെ കണ്ടെത്താനായില്ല.
തീരദേശ പൊലിസിന്റെ  നേതൃത്വത്തിലുള്ള സംഘം ആഴിമല, ചൊവ്വര ഭാഗത്തെ കടലില്‍ ഇന്നലെ പകല്‍ മുഴുവന്‍ തിരച്ചില്‍  നടത്തിയെങ്കിലും ഫലം കണ്ടില്ല. ഞായറാഴ്ച ഉച്ചയ്ക്ക്   സെല്‍ഫിയെടുക്കാനുള്ള ശ്രമത്തിനിടയിലാണ് പശ്ചിമ ബംഗാളിലെ ജല്‍പായ്ഗുരി സ്വദേശികളായ  പ്രദീപ് റോയ് (27), സുകുമാര്‍ റോയ് (22) എന്നിവര്‍ തിരയില്‍പെട്ടത്. ഇവരുടെ കൂടെയുണ്ടായിരുന്ന  പ്രസന്‍ജിത്ത് റോയ് (24) തിരയില്‍ അകപ്പെട്ടെങ്കിലും പാറയില്‍ പിടിച്ച്  രക്ഷപ്പെട്ടു.ഇന്നലെ രാവിലെ ആറുമണിക്ക് ആരംഭിച്ച തിരച്ചിലില്‍ തീരദേശ പൊലിസിന്റെ  രണ്ടു  ബോട്ടുകള്‍ക്കൊപ്പം മറൈന്‍ എന്‍ഫോഴ്‌സമെന്റ്, തീര രക്ഷാസേനാ ബോട്ടുകളും മുങ്ങല്‍ വിദഗ്ധരും പങ്കുചേര്‍ന്നു. അവധിദിനത്തില്‍ കടല്‍ കാണാന്‍  എത്തിയതായിരുന്നു അഞ്ചു പേരടങ്ങിയ അന്യസംസ്ഥാന തൊഴിലാളി സംഘം.