മലപ്പുറം: ഈ വര്‍ഷത്തെ ഗാന്ധിജയന്തി വാരാഘോഷം ഒക്‌ടോബര്‍ രണ്ട് മുതല്‍ വിവിധ പരിപാടികളോടെ ആഘോഷിക്കാന്‍ ഗാന്ധിദര്‍ശന്‍ സമിതിയും സര്‍വോദയമണ്ഡലം ജില്ലാ കമ്മിറ്റിയും സംയുക്തമായി സംഘടിപ്പിച്ച യോഗത്തില്‍ തീരുമാനിച്ചു.
പബ്ലിക് റിലേഷന്‍ വകുപ്പ്, നെഹ്‌റു യുവകേന്ദ്ര എന്നിവയുടെ സഹകരണത്തോടെയാണ് പരിപാടികള്‍ നടത്തുന്നത്. ഇതിന്റെ ഭാഗമായി രണ്ടിന് ജില്ലാതല പരിപാടികളുടെ ഉദ്ഘാടനം തിരുന്നാവായ ഗാന്ധിസ്തൂപത്തില്‍ പുഷ്പാര്‍ച്ചന നടത്തും. തുടര്‍ന്ന് ഗാന്ധിയന്‍ ദര്‍ശന സെമിനാര്‍ നടത്തും. മൂന്ന് മുതല്‍ എട്ടു വരെ ശുചീകരണം, ലഹരിവിരുദ്ധ സെമിനാര്‍, വിദ്യാര്‍ഥികള്‍ക്കുള്ള ഗാന്ധിക്വിസ് മത്സരം, ദേശീയ പ്രസ്ഥാനവുമായി ബന്ധപ്പെട്ട് സോപ്പ് നിര്‍മാണം, ഖാദി ഉത്പന്ന പ്രചാരണ യാത്ര എന്നിവ സംഘടിപ്പിക്കും.
എട്ടിന് സമാപനത്തോടനുബന്ധിച്ച് വിദ്യാര്‍ഥികള്‍ക്ക് ഗാന്ധിദര്‍ശന്‍ നേതൃത്വപരിശീലന ക്ലാസ് സംഘടിപ്പിക്കും. തവനൂര്‍ ജി.എം.യു.പി സ്‌കൂളില്‍ നടന്ന യോഗത്തില്‍ കെ.വി സുകുമാരന്‍ മാസ്റ്റര്‍, പി.കെ നാരായണന്‍, ഇ ഹൈദരാലി, പി.വി ഉദയകുമാര്‍, ആര്‍ പ്രസന്നകുമാരി, എന്‍.ടി മുരളി പങ്കെടുത്തു.