മണ്ണാര്‍ക്കാട്: തിരുവിഴാംകുന്ന് ഫാമിലെ ബ്രുസല്ലോസിസ് രോഗ ബാധ പൊതുജനം ആശങ്കപ്പെടേണ്ടതില്ലെന്ന് വെറ്ററിനറി സര്‍വ്വകലാശാല ഉന്നതതല സംഘം വാര്‍ത്താ സമ്മേളനത്തില്‍ അറിയിച്ചു. അസുഖം ബാധിച്ച 90 ഓളം ഉരുക്കളെ മണ്ണുത്തിയിലെ ആധുനിക റെന്ററിങ് പ്ലാന്റില്‍ ദയാവധം നടത്താന്‍ കേന്ദ്ര അനിമല്‍ വെല്‍ഫയര്‍ ബോര്‍ഡ് അനുമതി നല്‍കിയിട്ടുണ്ടെന്നും രണ്ടു മാസത്തിനകം ഇത് ഘട്ടം ഘട്ടമാക്കി പൂര്‍ത്തിയാക്കുമെന്നും സംഘം അറിയിച്ചു. അസുഖം ബാധിച്ച ഉരുക്കളെ പ്രത്യേകം ഷെഡുകളില്‍ മാറ്റി പാര്‍പ്പിക്കുകുയം ശാസ്ത്രീയ പ്രതിരോധ നടപടികള്‍ ഏര്‍പ്പെടുത്തിയിട്ടുണ്ടെന്നും, ഫാമില്‍ നിന്നും വിതരണം ചെയ്യുന്ന പാല്‍, രോഗബാധയില്ല എന്ന് വിവിധ പരിശോധനകളിലൂടെ ഉറപ്പുവരുത്തിയ ഉരുക്കളുടെതാണന്നും ഈ പാല്‍ ഉപയോഗിക്കുന്നത് കൊണ്ട് മനുഷ്യ ആരോഗ്യത്തിന് ഒരു പ്രശ്‌നവുമുണ്ടാവുകയില്ലെന്നും ഉന്നത സംഘം അറിയിച്ചു. അസുഖം ബാധിച്ച ഉരുക്കളുടെ പാല്‍ ബയോഗ്യാസ് പ്ലാന്റില്‍ ഒഴുക്കി കളയുകയാണെന്നും ഇത് ഉപയോഗിക്കുന്നില്ലെന്നും സംഘം പറഞ്ഞു.
ലാഭേച്ഛയില്ലാതെ പ്രവര്‍ത്തിക്കുന്ന ഫാം ഡബ്ലിയു.എച്ച്.ഒ, ഒ.ഐ.ഇ, എഫ്.എ.ഒ എന്നീ അന്താരാഷ്ട്ര മാനദണ്ഡങ്ങള്‍ പാലിക്കുന്നുണ്ടെന്നും ഫാമിലെ തൊഴിലാളികള്‍ക്കും, ജീവനക്കാര്‍ക്കും ബോധവല്‍ക്കരണവും, സുരക്ഷാ ക്രമീകരണങ്ങളും കൃത്യമായി നടപ്പാക്കുന്നുണ്ടെന്നും സംഘം പറഞ്ഞു.
ഫാമില്‍ സ്ഥിരീകരിക്കപ്പെട്ടത് മനുഷ്യരിലേക്ക് പകരാന്‍ വളരെ വിരളമായ സാധ്യത മാത്രമുളള ബ്രൂസില്ലോസിസ്- എ വിഭാഗത്തില്‍പ്പെട്ട രോഗബാധയാണെന്നും, ഇത് അസുഖം ബാധിച്ച ഉരുക്കളുടെ പാല്‍ തിളപ്പിക്കാതെ ഉപയോഗിക്കുമ്പോള്‍ മാത്രമെ മനുഷ്യന് പടരുകയൊളളുവെന്നും സംഘാംഗങ്ങളായ ഡോ. ജോസഫ് മാത്യു, ഡോ. മിനി, ഡോ. ട്രിസമോള്‍, ഡോ. വൃന്ദ, ഡോ. ഷിബു സൈമണ്‍ വാര്‍ത്തസമ്മേളനത്തില്‍ പറഞ്ഞു