തിരുവനന്തപുരം: ലോക്‌സഭാ തെരഞ്ഞെടുപ്പിനുള്ള അന്തിമ വോട്ടര്‍പട്ടിക തയ്യാറായി. കേരളത്തില്‍ 2,77,49,159 വോട്ടര്‍മാരാണ് വോട്ടര്‍ പട്ടികയില്‍ ഉള്ളതെന്ന് മുഖ്യതെരഞ്ഞെടുപ്പ് ഓഫിസര്‍ സഞ്ജയ് കൗള്‍ അറിയിച്ചു. ജനുവരി 22ന് പ്രസിദ്ധീകരിച്ച വോട്ടര്‍ പട്ടികയില്‍ നിന്ന് 6,49,833 വോട്ടര്‍മാരുടെ വര്‍ധനവാണ് അന്തിമ വോട്ടര്‍ പട്ടികയിലുള്ളത്. 2,01,417 പേര്‍ ഒഴിവായിട്ടുമുണ്ട്. കൂടുതല്‍ വോട്ടര്‍മാരുള്ള മണ്ഡലം തൃശൂരാണ്. കുറവ് ഇടുക്കിയിലും.

കൂടുതല്‍ വോട്ടര്‍മാര്‍ ഉള്ള ജില്ലകളില്‍ ഒന്നാമത് മലപ്പുറമാണ് 33,93,884 വേട്ടര്‍മാര്‍. കുറവ് വോട്ടര്‍മാര്‍ ഉള്ള ജില്ല വയനാടും 6,35,930. കൂടുതല്‍ സ്ത്രീ വോട്ടര്‍മാര്‍ ഉള്ള ജില്ലയും മലപ്പുറം തന്നെയാണ്- 16,97,132. കൂടുതല്‍ ഭിന്നലിംഗ വോട്ടര്‍മാരുള്ള ജില്ല തലസ്ഥാനമാണ്. തിരുവനന്തപുരത്ത് 94 ഭിന്നലിംഗ വോട്ടര്‍മാരാണുള്ളത്. ആകെ 89,839 പ്രവാസി വോട്ടര്‍മാരാണ് ലോക്‌സഭാ തെരഞ്ഞെടുപ്പിനുള്ളത്. പ്രവാസി വോട്ടര്‍മാര്‍ കൂടുതലുള്ള ജില്ല കോഴിക്കാടാണ്- 35,793. 18-19 പ്രായക്കാരായ കന്നിവോട്ടര്‍മാര്‍ 5,34,394 പേരാണ്. ആകെ വോട്ടര്‍മാരില്‍ 1,43,33,499 പേര്‍ സ്ത്രീകളും 1,34,15293 പേര്‍ പുരുഷന്മാരുമാണ്. സ്ത്രീ വോട്ടര്‍മാരില്‍ 3,36,770 പേരുടെയും പുരുഷ വോട്ടര്‍മാരില്‍ 3,13,005 പേരുടെയും വര്‍ധനയുമുണ്ട്. ആകെ ഭിന്നലിംഗ വോട്ടര്‍മാര്‍-367. സ്ത്രീ പുരുഷ അനുപാതം 1,000: 1,068. 80 വയസ്സിന് മുകളില്‍ പ്രായമുള്ള 6,27,045 വോട്ടര്‍മാരും കേരളത്തിലുണ്ട്.

ലോക്‌സഭാ മണ്ഡലം തിരിച്ചുള്ള വോട്ടര്‍മാരുടെ കണക്കുകള്‍:

തിരുവനന്തപുരം - 14,30,531, ആറ്റിങ്ങല്‍ - 13,96,807, കൊല്ലം - 13,26,648, പത്തനംതിട്ട -14,29,700, മാവേലിക്കര - 13,31,880, ആലപ്പുഴ - 14,00,083, കോട്ടയം - 12,54,823, ഇടുക്കി -12,50,157, എറണാകുളം - 13,24,047, ചാലക്കുടി - 13,10,529, തൃശൂര്‍ - 14,83,055, ആലത്തൂര്‍ - 13,37,496, പാലക്കാട് - 13,98,143 പൊന്നാനി - 14,70,804 മലപ്പുറം - 14,79,921 കോഴിക്കോട് - 14,29,631 വയനാട് - 14,62,423, വടകര - 14,21,883, കണ്ണൂര്‍ - 13,58,368, കാസര്‍കോട് - 14,52,230.

ജനുവരിയില്‍ പ്രസിദ്ധീകരിച്ച അന്തിമ വോട്ടര്‍പട്ടികയില്‍ പേരുള്‍പ്പെടാത്തവര്‍ക്ക് മാര്‍ച്ച് 25 വരെ അപേക്ഷ സമര്‍പ്പിക്കാന്‍ അവസരം നല്‍കിയിരുന്നു. വോട്ടര്‍ പട്ടിക ശുദ്ധീകരണ നടപടിയും കമ്മീഷന്‍ നടത്തി. സ്‌പെഷ്യല്‍ സമ്മറി റിവിഷന്‍ കാലയളവില്‍ സോഫ്റ്റ് വെയര്‍ മുഖേന കണ്ടെത്തിയ സ്ഥലപരമായി സമാനതയുള്ള എന്‍ട്രികള്‍, ഫോട്ടോ സമാനമായ എന്‍ട്രികള്‍ എന്നിവ ബി.എല്‍.ഒ മാര്‍ വഴി പരിശോധിച്ച് അധികമായി പട്ടികയില്‍ ഉള്‍പ്പെട്ടവരെ ഒഴിവാക്കുകയായിരുന്നു.

അന്തിമ വോട്ടര്‍പട്ടിക സംബന്ധിച്ച പരാതികളും ആക്ഷേപങ്ങളും പരിഹരിച്ചും മാര്‍ച്ച് 25 വരെ ലഭിച്ച വിവിധ അപേക്ഷകള്‍ പരിഗണിച്ചുമാണ് അന്തിമ വോട്ടര്‍ പട്ടിക പ്രസിദ്ധീകരിച്ചിരിക്കുന്നത്. അന്തിമവോട്ടര്‍ പട്ടിക പരിശോധിക്കുന്നതിനായി സംസ്ഥാന മുഖ്യതെരഞ്ഞെടുപ്പ് ഓഫിസറുടെ വെബ്‌സൈറ്റിലും (www.ceo.kerala.gov.in) താലൂക്ക് ഓഫിസുകളിലും വില്ലേജ് ഓഫിസുകളിലും ബൂത്ത് ലെവല്‍ ഓഫിസറുടെ കൈവശവും വോട്ടര്‍ പട്ടിക ലഭ്യമാക്കിയിരുന്നു. സംസ്ഥാനത്തെ അംഗീകൃത രാഷ്ട്രീയ പാര്‍ട്ടികള്‍ക്ക് താലൂക്ക് ഓഫിസുകളില്‍ നിന്ന് വോട്ടര്‍ പട്ടിക കൈപ്പറ്റാനുള്ള സംവിധാനവും ഒരുക്കിയിരുന്നു.