ഒല്ലൂര്‍: തൃശൂർ ഒല്ലൂരില്‍ ഇ.എസ്.ഐക്ക് സമീപം സ്വകാര്യ ബസുകള്‍ കൂട്ടിയിടിച്ച് ഡ്രൈവര്‍ ഉള്‍പ്പെടെ 24 പേര്‍ക്ക് പരിക്ക്. വെള്ളിയാഴ്ച്ച രാവിലെ 11 ഓടെ തൃശൂരില്‍ നിന്ന് പാലപ്പിള്ളിയിലേക്ക് പോകുന്ന സുമംഗലിസ് ബസും കല്ലൂരില്‍നിന്ന് തൃശൂരിലേക്ക് പോകുകയായിരുന്ന മാത ബസും നേര്‍ക്കുനേര്‍ കൂട്ടിയിടിച്ചാണ് അപകടമുണ്ടായത്. 

ഇടിയുടെ ആഘാതത്തില്‍ മാത ബസിന്റെ ഡ്രൈവറുടെ ഭാഗം ഭാഗികമായി തകര്‍ന്നു. സീറ്റില്‍ കുടുങ്ങിപ്പോയ ഡ്രൈവറെ കാബിന്‍ പൊളിച്ചാണ് പുറത്തെത്തിച്ചത്. ഇയാളെ സ്വകാര്യ ആശുപത്രിയില്‍ പ്രവേശിപ്പിച്ചു. പരിക്കേറ്റ യാത്രക്കാരെയും വിവിധ ആശുപത്രികളില്‍ പ്രവേശിപ്പിച്ചിട്ടുണ്ട്. 

അതേസമയം സുമംഗലി ബസ് അമിത വേഗത്തിലായിരുന്നു വന്നതെന്ന് ദൃക്‌സാക്ഷികള്‍ പറയുന്നു. അപകടത്തെ തുടര്‍ന്ന് തടസപ്പെട്ട ഗതാഗതം പൊലിസെത്തിയാണ് പുനരാരംഭിച്ചത്.