ആലുവ: ജനങ്ങള്‍ക്ക് ഭീഷണിയായ തെരുവ് നായകളെ കൊല്ലാന്‍ അനുമതി തേടി സുപ്രിംകോടതിയെ സമീപിക്കുമെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. നിയമവിദഗ്ധരുമായി കൂടിയാലോചനകള്‍ നടന്നുവരികയാണെന്നും ഈയാഴ്ച തന്നെ ഹരജി നല്‍കുമെന്നും അദ്ദേഹം പറഞ്ഞു.
അക്രമകാരികളായ തെരുവുനായകളെ കൊല്ലാന്‍ നേതൃത്വം നല്‍കിയ ചെങ്ങമനാട് ഗ്രാമപഞ്ചായത്ത് പ്രസിഡന്റ് പി.ആര്‍ രാജേഷും അംഗങ്ങളുമായുള്ള കൂടികാഴ്ചയ്ക്ക് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. അടുത്ത കാലത്ത് കേന്ദ്രസര്‍ക്കാര്‍ ഭേദഗതി ചെയ്ത മൃഗസംരക്ഷണ നിയമ പ്രകാരമാണ് തദ്ദേശ സ്വയംഭരണ സ്ഥാപനങ്ങള്‍ക്ക് ഉണ്ടായിരുന്ന അധികാരം ഇല്ലാതായത്.
ഇതിനെ ചോദ്യം ചെയ്തായിരിക്കും സുപ്രിംകോടതിയെ സമീപിക്കുക. അക്രമകാരികളായ നായകളെ കൊന്ന ചെങ്ങമനാട് പഞ്ചായത്ത് പ്രസിഡന്റ് പി.ആര്‍ രാജേഷ്, വൈസ് പ്രസിഡന്റ് ആശ ഏലിയാസ് എന്നിവര്‍ക്കും മറ്റ് ഭരണസമിതി അംഗങ്ങള്‍ക്കുമെതിരേ പൊലിസ് കേസെടുത്ത നടപടി ശരിയല്ല.
താന്‍ ആഭ്യന്തര മന്ത്രിയായിരിക്കെ ഇത്തരം സംഭവങ്ങളില്‍ കേസെടുക്കരുതെന്ന് പൊലിസിന് നിര്‍ദേശം നല്‍കിയിരുന്നു.
 അക്രമകാരികളായ നായകളെ കൊല്ലാന്‍ രാഷ്ട്രീയത്തിനതീതമായി ഒരുമിച്ച് നിന്ന പഞ്ചായത്ത് അംഗങ്ങളെ ചെന്നിത്തല പ്രത്യേകം അഭിനന്ദിക്കുകയും പൂര്‍ണ പിന്തുണ പ്രഖ്യാപിക്കുകയും ചെയ്തു. അന്‍വര്‍ സാദത്ത് എം.എല്‍.എയുടെ സാന്നിധ്യത്തില്‍ ആലുവ പാലസിലായിരുന്നു കൂടികാഴ്ച. തെരുവുനായ ഉന്മൂല സംഘം ചെയര്‍മാന്‍ ജോസ് മാവേലിയും  പഞ്ചായത്ത് അംഗങ്ങളും സംബന്ധിച്ചു.
സംഭവത്തില്‍ ഭരണസമിതി അംഗങ്ങളെ കൂടാതെ ജോസ് മാവേലി, നായ പിടിക്കാനെത്തിയ വരാപ്പുഴ സ്വദേശി രഞ്ജന്‍, നായകളെ കയറ്റിക്കൊണ്ടുപോയ ഓട്ടോറിക്ഷ ഡ്രൈവര്‍ ജോണ്‍സന്‍ എന്നിവരെയാണ് പൊലിസ് അറസ്റ്റ് ചെയ്ത് ജാമ്യത്തില്‍ വിട്ടത്. ഐ.പി.സി 149, 428, 429 വകുപ്പുകള്‍ പ്രകാരവും, പ്രിവന്‍ഷന്‍ ഓഫ് ക്രുവല്‍റ്റി ടു അനിമല്‍ ആക്റ്റ് 1960 വകുപ്പുകള്‍ പ്രകാരവുമാണ് കേസെടുത്തിരുന്നത്. ഞായറാഴ്ച രാത്രിയും തിങ്കളാഴ്ചയുമായി പഞ്ചായത്തിന്റെ വിവിധ ഭാഗങ്ങളില്‍ നിന്നായി 30 ഓളം തെരുവ് നായകളെയാണ് കൊന്നത്.