15 ദിവസത്തിനിടെ വാടക ഇനത്തില്‍ കേരള ഹെല്‍ത്ത് റിസേര്‍ച്ച് വെല്‍ഫയര്‍ സൊസൈറ്റിക്ക് നഷ്ടമായത് ഒരു ലക്ഷം രൂപ
മാനന്തവാടി: കേരള ഗവ. മെഡിക്കല്‍ ഓഫിസേഴ്‌സ് അസോസിയേഷന്റെ നേതൃത്വത്തില്‍ സര്‍ക്കാര്‍ ഡോക്ടര്‍മാര്‍ നടത്തുന്ന നിസഹകരണ സമരത്തെ തുടര്‍ന്ന് ജില്ലാ ആശുപത്രിയിലെത്തുന്ന രോഗികള്‍ ദുരിതത്തില്‍.
ഈമാസം ആറ് മുതലാണ് സമരം തുടങ്ങിയത്. ഒ.പിയിലെത്തുന്ന രോഗികളെയും അത്യഹിത വിഭാഗത്തില്‍ പ്രവേശിപ്പിക്കുന്ന രോഗികളെയും വാര്‍ഡുകളിലുള്ള രോഗികളെയും മാത്രമാണ് പരിശോധിക്കുന്നത്.
പേ വാര്‍ഡുകളില്‍ പ്രവേശിക്കുന്ന രോഗികളെ പരിശോധിക്കില്ലെന്നാണ് ഡോക്ടര്‍മാരുടെ നിലപാട്. ഇതോടെ കഴിഞ്ഞ 15 ദിവസത്തിനിടെ വാടക ഇനത്തില്‍ കേരള ഹെല്‍ത്ത് റിസേര്‍ച്ച് വെല്‍ഫയര്‍ സൊസൈറ്റിക്ക് ഒരു ലക്ഷം രൂപയാണ് നഷ്ടമായത്. എട്ട് ഡീലക്‌സ് റൂമുകളും എട്ട് സെമിഡീലക്‌സ് റൂമുകളും 24 ജനത വാര്‍ഡുകളുമാണുള്ളത്.
ഡീലക്‌സിന് മുന്നൂറ്റി അന്‍പതും, സെമിഡീലക്‌സിന് ഇരുനൂറ്റി എഴുപത്തി അഞ്ചും ജനതക്ക് നൂറു രൂപയുമാണ് ദിനംപ്രതി വാടക ഈടാക്കുന്നത്. വാര്‍ഡുകളില്‍ കിടക്കാന്‍ സ്ഥലമില്ലാത്തപ്പോഴാണ് രോഗികള്‍ പേ വാര്‍ഡുകളെ ആശ്രയിക്കുന്നത്.
സമരം അവസാനിച്ചില്ലെങ്കില്‍ രോഗികളും സൊസൈറ്റിയും ഒരു പോലെ കുഴങ്ങും. അതേ സമയം സമരത്തില്‍ പങ്കെടുക്കാത്ത ഒരു ഡോക്ടര്‍ പേവാര്‍ഡില്‍ എത്തി തന്റെ രോഗികളെ പരിശോധിക്കുന്നത് നേരിയ ആശ്വാസം നല്‍കുന്നുï്.