കൊല്ലം: പ്രസിഡന്റ്‌സ് ട്രോഫി ജലോത്സവവുമായി ബന്ധപ്പെട്ടുള്ള മീഡിയ റിലേഷന്‍സ് കമ്മിറ്റി യോഗം നാളെ ഉച്ചയ്ക്ക് 12ന് സിവില്‍ സ്റ്റേഷനിലെ ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് മേഖലാ ഡെപ്യൂട്ടി ഡയറക്ടറുടെ കാര്യാലയത്തില്‍ നടക്കുമെന്ന് കണ്‍വീനര്‍ കൂടിയായ ഡെപ്യൂട്ടി ഡയറക്ടര്‍ എന്‍ സുനില്‍കുമാര്‍ അറിയിച്ചു.
തെങ്ങിന്‍ തൈ
വിതരണം
ആയൂര്‍: വെളിനല്ലൂര്‍ ഗ്രാമപഞ്ചായത്തിലെ മുഴുവന്‍ വീടുകള്‍ക്കും അത്യുല്‍പാദനശേഷിയുള്ള തെങ്ങിന്‍ തൈ വിതരണം നടത്തുന്നതുള്‍പ്പെടെയുള്ള വാര്‍ഷിക പദ്ധതിക്ക് അംഗീകാരമായി. ഏഴായിരം വീടുകളിലും ഓരോ തെങ്ങിന്‍ തൈ ഗ്രാമപഞ്ചായത്തിന്റെ ചെലവില്‍ നട്ടുപിടിപ്പിക്കും. 2016-17 സാമ്പത്തിക വര്‍ഷത്തില്‍ 6,80,00,400 രൂപയുടെ അടങ്കല്‍ തുകയാണ് അംഗീകരിച്ചിട്ടുള്ളത്. ഉല്‍പാദന മേഖലയ്ക്ക് 64,28,250 രൂപയും സേവന മേഖലയ്ക്ക് 1,67,63,249 രൂപയും പട്ടികജാതി ഉപപദ്ധതികള്‍ക്കായി 64,73,500 രൂപയും വകയിരുത്തിയിട്ടുണ്ടെന്ന് ഗ്രാമപഞ്ചായത്ത് പ്രസിഡന്റ് എംകെ നിര്‍മല അറിയിച്ചു.