മുട്ടില്‍: വയനാട് മുസ്‌ലിം യതീംഖാനയിലെ മുഹമ്മദ് ആദിലിന് സര്‍ക്കാര്‍ ക്വാട്ടയില്‍ ബി.ഡി.എസിന് അഡ്മിഷന്‍ ലഭിച്ചു. തിരുവനന്തപുരം സര്‍ക്കാര്‍ ഡെന്റല്‍ കോളജിലാണ് അഡ്മിഷന്‍. വെള്ളമുണ്ട തേറ്റമല സ്വദേശികളായ ജലീല്‍ ആയിഷ ദമ്പതിമാരുടെ മകനായ ആദില്‍ കുഞ്ഞോം ഡബ്ല്യു.എം.ഒ ശരീഫ ഫാത്തിമ തഹ്ഫീദുല്‍ ഖുര്‍ആന്‍ സെന്ററില്‍ നിന്ന് ഖുര്‍ആന്‍ മന:പാഠമാക്കി. 2013ല്‍ മുട്ടില്‍ ഡബ്ല്യു.ഒ.വി.എച്ച്.എസ് സ്‌കൂളില്‍ പഠിച്ച് പത്താം ക്ലാസില്‍ മുഴുവന്‍ വിഷയങ്ങള്‍ക്കും എ പ്ലസ് കരസ്ഥമാക്കി. 2015ല്‍ ഡബ്ല്യു.ഒ.എച്ച്.എസ് സ്‌കൂളില്‍ നിന്നും പ്ലസ്ടുവില്‍ 1200ല്‍ 1200 മാര്‍ക്കും നേടി. മുഹമ്മദ് ആദിലിനെ ഡബ്ല്യു.എം.ഒ പ്രസിഡന്റ് കെ.കെ അഹ്മദ് ഹാജി, സെക്രട്ടറി എം.എ മുഹമ്മദ് ജമാല്‍, മായന്‍ മണിമ, അണിയാരത്ത് മമ്മൂട്ടി ഹാജി, പി. അബ്ദു റസാഖ്, മാനേജര്‍ മുജീബ് റഹ്മാന്‍ ഫൈസി തുടങ്ങിയവര്‍ അനുമോദിച്ചു.