കാക്കനാട്: തൃക്കാക്ക നഗരസഭ പരിധിയിലുള്ള കെന്നടിമുക്ക് ജംഗ്ഷനു സമീപം സ്വകാര്യ ഫ്‌ലാറ്റ്-വില്ലാ ഗ്രൂപ്പ് പൊതു തോട് കൈയേറിയതിനെതിരെ പ്രക്ഷോഭവുമായി നാട്ടുകാര്‍ രംഗത്ത്.
സ്വകാര്യ കെട്ടിട നിര്‍മ്മാണ സ്ഥലത്തേക്ക് പോകുന്ന റോഡ് ഇറിഗേഷന്‍ തോടിനു സമീപത്തു കൂടിയാണ് പോകുന്നത്. എന്നാല്‍ റോഡിനു വീതിയില്ലാത്തതിനാല്‍ തോട് കൈയേറുകയാണുണ്ടായത്. ഇതുമൂലം തോട്ടിലൂടെയുള്ള നീരൊഴുക്ക് തടസപ്പെടുകയും ചെയ്തു.
പൊതു തോട് കയ്യേറിയതു മുനിസിപ്പല്‍ ഇറിഗേഷന്‍ അധികാരികള്‍ അന്യേഷിക്കുവാന്‍ താത്പര്യം കാണിക്കാതെ സ്വകാര്യ കെട്ടിട നിര്‍മാണക്കാരെ സഹായിക്കുന്ന നിലപാട് ആണന്നും, അധികാരികള്‍ റോഡ് കൈയേറ്റം അറിഞ്ഞതായി ഭാവിക്കുന്നില്ല എന്നും കൂടാതെ കൈയേറിയ ഭാഗത്ത് ഫയലിങ് നിര്‍മാണം നടക്കുന്നതായും ആക്ഷേപമുണ്ട്.
സാധാരക്കാര്‍ക്ക് വീട് നിര്‍മാണവുമായി ബന്ധപ്പെട്ടും മറ്റും എല്ലാ വിധ ചട്ടങ്ങളും നിര്‍ബന്ധമാക്കുമ്പോള്‍, വന്‍ സ്വകാര്യ കെട്ടിട നിര്‍മാതാക്കളെ സഹായിക്കുകയും സംരക്ഷിക്കുന്നതുമായ നിലപാടാണ് തൃക്കാക്കര നഗരസഭ ഉദ്യോഗസ്ഥര്‍ എടുക്കുന്നതെന്നും നാട്ടുകാര്‍ പറയുന്നത്.