കൊല്ലം: കാര്‍ഷികസമൃദ്ധി വിളിച്ചോതുന്ന തോട്ടത്തിലൂടെ നടന്നുവരുന്ന കര്‍ഷകന്‍, പുഴയരികിലെ മാലിന്യക്കൂമ്പാരം നീക്കം ചെയ്യുന്നവര്‍, കൊല്ലം നഗരത്തിന്റെ ഹൃദയഭാഗമായ ചിന്നക്കടയിലെ അടിപ്പാതയുടെ ഇരുവശവും പച്ചവിരിച്ചു നില്‍ക്കുന്ന തണല്‍മരങ്ങളും പൂച്ചെടികളും...എന്റെ സ്വപ്നത്തിലെ കേരളം എന്ന വിഷയം കാന്‍വാസിലാക്കിയപ്പോള്‍ വിദ്യാര്‍ഥികളില്‍ ഏറെപ്പേരും കൃഷിക്കും പ്രകൃതിസംരക്ഷണത്തിനുമാണ് മുന്‍തൂക്കം നല്‍കിയത്.
സംസ്ഥാന സര്‍ക്കാര്‍ 100 ദിനം പിന്നിടുന്നതിനോടനുബന്ധിച്ചുള്ള ആഘോഷങ്ങളുടെ ഭാഗമായി ഇന്‍ഫര്‍മേഷന്‍പബ്ലിക് റിലേഷന്‍സ് വകുപ്പും ആശ്രാമം എയിറ്റ് പോയിന്റ് ആര്‍ട്ട് കഫേയും സംയുക്തമായാണ് ഹൈസ്‌കൂള്‍ വിദ്യാര്‍ഥികള്‍ക്കായി ചിത്രരചനാ മത്സരം സംഘടിപ്പിച്ചത്. സ്വപ്നത്തില്‍പോലും കൃഷിയിടങ്ങളെ
ഉപേക്ഷിക്കാനാവില്ലെന്നാണ് ചിത്രങ്ങളിലൂടെ കുട്ടികള്‍ വ്യക്തമാക്കിയത്. ആര്‍ട്ട് കഫേതന്നെ മത്സര വേദിയായത് വിദ്യാര്‍ഥികള്‍ക്ക് വേറിട്ട അനുഭവമായി.
വരയിലെ ഭാവിവാഗ്ദാനങ്ങളെ കാണുവാന്‍ സംസ്ഥാന ലളിതകലാ അക്കാദമി ചെയര്‍മാന്‍ സത്യപാലും സെക്രട്ടറി പൊന്ന്യം ചന്ദ്രനും മത്സരവേദിയിലെത്തി. ആര്‍ട്ട് ക്യുറേറ്റര്‍ ഷെന്‍ലേയും ആര്‍ട്ടിസ്റ്റ് കൃഷ്ണ ജനാര്‍ദ്ദനയും വിധികര്‍ത്താക്കളായിരുന്നു. ജില്ലാ ഇന്‍ഫര്‍മേഷന്‍ ഓഫീസര്‍ സി അജോയ്, അസിസ്റ്റന്റ് എഡിറ്റര്‍ ജസ്റ്റിന്‍ ജോസഫ്, അസിസ്റ്റന്റ് ഇന്‍ഫര്‍മേഷന്‍ ഓഫീസര്‍ പി.ആര്‍. സാബു തുടങ്ങിയവര്‍ സന്നിഹിതരായിരുന്നു.
മത്സരത്തില്‍ പൂയപ്പള്ളി ഗവണ്‍മെന്റ് ഹൈസ്‌കൂളിലെ ജിക്കി പി സാമുവല്‍ ഒന്നാം സ്ഥാനം നേടി. ചാത്തന്നൂര്‍ എന്‍.എസ്.എസ് ഹൈസ്‌കൂളിലെ അന്‍സിയ റഹ്മാനും ചാത്തന്നൂര്‍ എന്‍.എസ്.എസ് എച്ച്.എസ്.എസിലെ ബി.എസ് അഭിജിത്തിനുമാണ് യഥാക്രമം രണ്ടും മൂന്നും സ്ഥാനങ്ങള്‍.