ന്യൂഡല്‍ഹി: വിവാദ ആള്‍ദൈവം ആശാറാം ബാപ്പു വീണ്ടും വിവാദത്തില്‍. ആരോഗ്യ പരിശോധനകള്‍ക്കായി എ.ഐ.ഐ.എം.എസില്‍ പ്രവേശിപ്പിച്ച സ്വയം പ്രഖ്യാപിത ആള്‍ദൈവമായ ആശാറാം നഴ്‌സിനെ കമന്റടിച്ചെന്നാണ് പുതിയ വിവാദം. പരിശോധനക്ക് മുമ്പായി ആശാറാമിന് ബ്രഡും വെണ്ണയുമായി എത്തിയ നഴ്‌സിന്റെ കവിള്‍ കശ്മിരി ആപ്പിള്‍ പോലെയാണെന്ന് ഉപമിച്ചതാണ് വിവാദമായത്.
സ്ത്രീകള്‍ക്ക് എതിരേയുള്ള പരാമര്‍ശങ്ങള്‍ നേരത്തെയും ആശാറാമിനെ വിവാദത്തിലാക്കിയിട്ടുണ്ട്. ഡല്‍ഹി കൂട്ടബലാല്‍സംഗത്തിനിരയായ പെണ്‍കുട്ടിയെ കുറിച്ചുള്ള പരാമര്‍ശം വിവാദമായിരുന്നു. പതിനാറുകാരിയെ പീഡിപ്പിച്ച കേസിലാണ് ആശാറാമിനെ അറസ്റ്റു ചെയ്തത്. സുപ്രിം കോടതി നിര്‍ദേശ പ്രകാരമാണ് ഇയാളെ എയിംസില്‍ പ്രവേശിപ്പിച്ചത്. കേസില്‍ കോടതി ജാമ്യം നിഷേധിച്ചിരുന്നു. ദൈനിക് ഭാസ്‌കര്‍ പത്രമാണ് പുതിയ വാര്‍ത്ത പുറത്തു വിട്ടത്.