മുക്കം: കാരശ്ശേരി ഗ്രാമപഞ്ചായത്ത് 2012-13, 14-15 വര്‍ഷങ്ങളിലെ പദ്ധതിയില്‍ ഉള്‍പ്പെടുത്തി 39.5 ലക്ഷം രൂപ വകയിരുത്തി നിര്‍മിച്ച കൂടാംപോയില്‍ കുടിവെള്ള പദ്ധതിയിലെ ക്രമക്കേട് സംബന്ധിച്ച് വിജിലന്‍സ് അന്വേഷണം നടത്താന്‍ കാരശ്ശേരി ഗ്രാമപഞ്ചായത്ത് ഭരണസമിതി സര്‍ക്കാരിനോട് ശുപാര്‍ശ ചെയ്തു.
പഞ്ചായത്തിലെ 11, 17 വാര്‍ഡുകള്‍ക്കായി നടത്തിയ കൂടാംപോയില്‍ കുടിവെള്ള പദ്ധതിയില്‍ 27.5 ലക്ഷം രൂപയുടെ ക്രമക്കേടാണ് ഓഡിറ്റ് വിഭാഗം കണ്ടെത്തിയത്. 2008ല്‍ പ്രസിഡന്റായിരുന്ന വി.കെ വിനോദിന്റെ നേതൃത്വത്തില്‍ നിര്‍മാണം പൂര്‍ത്തിയാക്കിയ കിണറാണ് പദ്ധതിക്കായി ഉപയോഗിച്ചത്.
ഇതിന് മുകളില്‍ കോണ്‍ക്രീറ്റ് ചെയ്ത് പമ്പ് ഹൗസ് നിര്‍മിക്കുകയും  45,750 രൂപയുടെ (മാര്‍ക്കറ്റ് എം.ആര്‍.പി) അഞ്ചു എച്ച്.പി മോട്ടറും കിണറില്‍ നിന്ന് 300 മീറ്ററ് അകലെ 71,000 രൂപ വില വരുന്ന 10,000 ലിറ്ററിന്റെ രണ്ടു പ്ലാസ്റ്റിക് ടാങ്കുമാണ് സ്ഥാപിച്ചത്. പൈപ്പ്‌ലൈന്‍ സ്ഥാപിക്കാന്‍ ഗുണഭോക്താക്കളില്‍ നിന്ന് പണം പിരിക്കുകയും ചെയ്തു. എസ്.സി ഫണ്ട് ഉപയോഗിക്കാന്‍ 50 എസ്.സി ഗുണഭോക്താള്‍ ഉണ്ടാകണമെന്നിരിക്കെ  ഫണ്ട് ദുര്‍വിനിയോഗം ചെയ്യുകയും ചെയ്തു.
ക്രമക്കേഡ് കണ്ടെത്തിയ സഹചര്യത്തില്‍ വിജിലന്‍സ് അന്വേഷണനത്തിന് സംസ്ഥാന സര്‍ക്കാരിനോട് ശുപാര്‍ശ ചെയ്യാന്‍ പ്രസിഡന്റ് വി.കെ വിനോദിന്റെ അധ്യക്ഷതയില്‍ ചേര്‍ന്ന ഭരണസമിതി യോഗം തീരുമാനിക്കുകയായിരുന്നു.