മാറഞ്ചേരി: പെരുമ്പടപ്പ് ബ്ലോക്ക് പഞ്ചായത്തിനെ സമ്പൂര്‍ണ ഒ.ഡി.എഫായി പ്രഖ്യാപിച്ചു. കോണ്‍ഫ്രന്‍സ് ഹാളില്‍ ബ്ലോക്ക് പഞ്ചായത്ത് പ്രസിഡന്റ് ആറ്റുണ്ണി തങ്ങള്‍ പ്രഖ്യാപനം നിര്‍വഹിച്ചു.
പദ്ധതി പ്രകാരം ബ്ലോക്ക് പഞ്ചായത്തിന് കീഴിലെ അഞ്ചു പഞ്ചായത്തുകളില്‍ നിന്നായി ശുചിമുറിയില്ലാത്ത 649 ഗുണഭോക്താക്കള്‍ക്ക് ശുചി മുറി നിര്‍മിക്കാന്‍ ധനസഹായം നല്‍കി. വികസന സ്റ്റാന്‍ഡിങ് കമ്മിറ്റി ചെയര്‍മാന്‍ അബ്ദുള്ള അധ്യക്ഷനായി. ബി.ഡി.ഒ ജോസ് കെ.വി, വെളിയങ്കോട് ഗ്രാമപഞ്ചായത്ത് പ്രസിഡന്റ് പ്രേമജാ സുധീരന്‍, പെരുമ്പടപ്പ് ഗ്രാമപഞ്ചായത്ത് പ്രസിഡന്റ് പൊറാടത്ത് കുഞ്ഞിമാന്‍, ബ്ലോക്ക് വൈസ് പ്രസിഡന്റ് സുബൈദ അബൂബക്കര്‍, ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ശോഭന സംസാരിച്ചു.