സിദ്ധാപുരം: മദ്‌റസകള്‍ മികവിന്റെ കേന്ദ്രങ്ങളാണന്നും, അറിവ് അനുഭവമാകുമ്പോള്‍ മൂല്യബോധവും, ഉത്തമ സംസ്‌കാരവുമുള്ള സമൂഹം വളര്‍ന്നുവരുമെന്നും പിണങ്ങോട് അബൂബക്കര്‍. ഈ രംഗത്ത് സമസ്ത കേരള ജംഇയ്യത്തുല്‍ ഉലമയുടെ പ്രവര്‍ത്തനം മാതൃകാപരമാണെന്നും അദ്ദേഹം പറഞ്ഞു. സിദ്ധാപുരം മുനവിറുല്‍ ഇസ്‌ലാം മദ്‌റസാ അങ്കണത്തില്‍ കുടക് ജില്ല ജംഇയ്യത്തുല്‍ മുഅല്ലിമീന്‍ സംഘടിപ്പിച്ച മഹല്ല് തല സംഗമത്തിന്റെ ഉദ്ഘാടന സമ്മേളനത്തില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. സിദ്ധാപുരം ജുമാ മസ്ജിദ് ഖതീബ് അബ്ദുസലാം ലത്വീഫി പ്രാര്‍ഥന നടത്തി. ജില്ലാ പ്രസിഡന്റ് കെ.പി അബൂബക്കര്‍ മുസ്‌ലിയാര്‍ അധ്യക്ഷനായി. 

എസ്.കെ.ജെ.എം.സി.സി കാര്യദര്‍ശി കുടക് അബ്ദുറഹ്മാന്‍ മുസ്‌ലിയാര്‍ ഉദ്ഘാടനം ചെയ്തു. ഖാസി എം.എം അബ്ദുല്ല ഫൈസി ഉസ്താദ് സമാപന കൂട്ടുപ്രാര്‍ഥനക്ക് നേതൃത്വം നല്‍കി. പി.ബി ഇസ്മാഈല്‍ മുസ്‌ലിയാര്‍, കെ ഉസ്മാന്‍ ഹാജി സിദ്ധാപുരം, പി.കെ മുഹമ്മദ്ഹാജി വിരാജ്‌പേട്ട, ഖലീല്‍ഫൈസി ഇര്‍ഫാനി, എം.സി അശ്രഫ് മുസ്‌ലിയാര്‍, ഹസൈനാര്‍ ഫൈസി, എന്‍.എന്‍ ഇഖ്ബാല്‍ മുസ്‌ലിയാര്‍, കെ.ടി മുഹമ്മദാജി സിദ്ധാപുരം, ആരിഫ് ഫൈസി, എം തംലീഖ് ദാരിമി, റഊഫ്ഹാജി, ബീരാന്‍ കുട്ടിഹാജി നാല്‍പ്പദേക്കറ, എ.കെ മുഹമ്മദ്ഹാജി നെല്യാഹുദിക്കേരി സംസാരിച്ചു.