റിയാദ്: മന്ത്രിമാരുടെയും മറ്റു ഉന്നത ഉദ്യോഗസ്ഥരുടേയും ശമ്പളവും ആനുകൂല്യങ്ങളും വെട്ടികുറയ്ക്കുകയും താത്കാലികമായി നിര്‍ത്തിവയ്ക്കുകയും ചെയ്ത നടപടിയെ തുടര്‍ന്നു വന്‍ ലാഭമായിരിക്കും ഖജനാവിന് ഉണ്ടാവുകയെന്ന് വിലയിരുത്തല്‍. മന്ത്രിമാരുടെ ശമ്പളം 20 ശതമാനവും രാജ്യത്തെ ഉന്നതാധികാര സഭയായ ശൂറാ കൗണ്‍സില്‍ അംഗങ്ങളുടെ ആനുകൂല്യങ്ങള്‍ 15 ശതമാനം വെട്ടികുറയ്ക്കുകയും മറ്റു സാമ്പത്തിക നിയന്ത്രണം ഏര്‍പ്പെടുത്തുകയും ചെയ്ത സഊദി ഭരണാധികാരി സല്‍മാന്‍ ഇബ്‌നു അബ്ദുല്‍ അസീസിന്റെ നടപടി ഖജനാവിന് താല്‍ക്കാലിക ആശ്വാസം ഉണ്ടാകുമെന്ന കണക്കുകളാണ് പുറത്തുവരുന്നത്.

സാമ്പത്തിക നിയന്ത്രണത്തിന്റെ ഭാഗമായി ശമ്പള, ആനുകൂല്യ വെട്ടികുറക്കലിന് പുറമേ, ഇതുവരെ നടന്നിരുന്നത് പോലെയുള്ള സാമ്പത്തിക ചിലവുകള്‍ കര്‍ശനമായി ചുരുക്കണം. കൂടാതെ മൊബൈല്‍ ടെലിഫോണ്‍ മറ്റു വ്യക്തിഗത ബില്ലുകള്‍ സ്വന്തമായി അടക്കണമെന്നും സര്‍ക്കാര്‍ ഓഫിസുകളില്‍ പുതിയ വാഹനങ്ങള്‍ വാങ്ങുന്നത് വരെ താത്കാലികമായി തടയുകയും ചെയ്തിട്ടുണ്ട്. എണ്ണ വിലയിടിവിന്റെ പശ്ചാത്തലത്തില്‍ കൂടുതല്‍ പ്രതിസന്ധിയിലേക്ക് പോകുന്നത് തടയാനായാണ് പുതിയ നിയന്ത്രണങ്ങള്‍ കൊണ്ടുവരാന്‍ സഊദി ഭരണകൂടം നിര്‍ബന്ധിതമായത്.

എന്നാല്‍, സര്‍ക്കാര്‍ ജീവനക്കാരുടെ ആനുകൂല്യങ്ങള്‍ വെട്ടിച്ചുരുക്കുന്നതടക്കമുള്ള പുതിയ തീരുമാനങ്ങള്‍ വാണിജ്യ മേഖലകളില്‍ കടുത്ത മാന്ദ്യം ഉണ്ടാക്കുമെന്ന് സാമ്പത്തിക വിദഗ്ധര്‍ ചൂണ്ടിക്കാട്ടി. വരുമാനത്തില്‍ കുറവുണ്ടാകുന്നതോടെ സ്വദേശി കുടുംബങ്ങള്‍ ചെലവ് ചുരുക്കല്‍ പ്രക്രിയകളിലേക്ക് കടക്കുമെന്നും ഇത് ചില്ലറ വ്യാപാരകേന്ദ്രങ്ങളില്‍ 25 മുതല്‍ 30 ശതമാനം വരെ കച്ചവടം കുറയ്ക്കാനും ഇടയാക്കുമെന്ന് വിലയിരുത്തുന്നുണ്ട്. എന്നാല്‍, അടുത്ത കാലങ്ങളില്‍ തന്നെ രാജ്യത്തിന്റെ സാമ്പത്തിക സ്ഥിതി പഴയ നിലയിലേക്ക് തന്നെ തിരിച്ചു വരുമെന്നും കൂടുതല്‍ ശക്തിയോടെ സാമ്പത്തിക രംഗം തുടരുമെന്നും വിലയിരുത്തുന്നവരുമുണ്ട്.