തിരുവനന്തപുരം: സ്വാശ്രയ പ്രശ്‌നത്തില്‍ നിയമസഭയ്ക്ക് മുന്നില്‍ അനിശ്ചിതകാല നിരാഹാരസമരം നടത്തുന്ന എം.എല്‍.എ അനൂപ് ജേക്കബിനെ ആശുപത്രിയിലേക്ക് മാറ്റി. ആരോഗ്യനില വഷളായതിനെ തുടര്‍ന്നാണ് ആശുപത്രിയിലേക്ക് മാറ്റുന്നത്. ഡോക്ടര്‍ അനൂപ് ജേക്കബിനെ പരിശോധിച്ച ശേഷം ആശുപത്രിയിലേക്ക് മാറ്റാന്‍ നിര്‍ദേശിക്കുകയായിരുന്നു. തിരുവനന്തപുരം മെഡിക്കല്‍ കോളജിലേക്കാണ് അനൂപിനെ മാറ്റിയത്.

സ്വാശ്രയപ്രശ്‌നത്തില്‍ കഴിഞ്ഞ നാലു ദിവസമായി നിരാഹാരം അനുഷ്ഠിച്ചുവരികയാണ് അനൂപ് ജേക്കബ്. അനൂപിനൊപ്പം നിരാഹര സമരം തുടങ്ങിയ ഹൈബി ഈഡനും ഷാഫി പറമ്പിലും നിരാഹാരസമരം തുടരുകയാണ്.

അതേ സമയം അനൂപിനെ ആശുപത്രിയിലേക്ക് മാറ്റിയത് മഞ്ഞപ്പിത്ത ലക്ഷണത്തെ തുടര്‍ന്നാണെന്ന് പ്രതിപക്ഷ നേതാവ്് രമേശ് ചെന്നിത്തല അറിയിച്ചു. മറ്റ് രണ്ട് പേരും നിരാഹാര സമരവുമായി മുന്നോട്ട് പോകുമെന്നും ചെന്നിത്തല അറിയിച്ചു.