ഫറോക്ക്: തൊഴിലാളികളുടെ കൂലിവര്‍ധനവ് വിഷയത്തില്‍ കരാറുകാരുടെ കടുപിടുത്തം കാരണം ബേപ്പൂര്‍ തുറമുഖം സ്തംഭനാവസ്ഥയില്‍.
ദ്വീപിലേക്കുളള ചരക്കു കയറ്റിറക്കിനായി വെസ്സുലകള്‍ തയാറടുക്കുമ്പോള്‍ വെസ്സല്‍ ഏജന്റമാര്‍ കൂലിവര്‍ധനയ്ക്കായി തൊഴിലാളികളുടെ ഡിമാന്റ് നോട്ടീസിന്റെ മറപിടിച്ചു തുറമുഖം സ്തംഭിപ്പിക്കാനൊരുങ്ങുന്നത്. ചരക്ക് നീക്കം അനന്തമായി വൈകിയാല്‍ വെസ്സുലകളും ചെറുകപ്പലുകളും ബാര്‍ജുകളുമെല്ലാം ബേപ്പൂര്‍ തുറമുഖം വിട്ട് മറ്റു തുറമുഖങ്ങളെ ആശ്രയിക്കും.  രണ്ടു വര്‍ഷമാണ് ബേപ്പൂര്‍ തുറമുഖത്തെ കയറ്റിറക്ക് തൊഴിലാളികളുടെ വേതന വര്‍ധനവിന്റെ കാലാവധി. നിലവില്‍ കൂലി വ്യവസ്ഥ കാലപരിധി സെപ്തംബര്‍ 30ന് അവസാനിച്ചു. പരിധി കഴിയും മുമ്പ് കൂലി വര്‍ധനവ് ആവശ്യപ്പെട്ടു നോട്ടീസ് നല്‍കുന്നത് പതിവാണ്.
ഇതു പ്രകാരം സി.ഐ.ടി.യു, എസ്.ടി.യു, ഐ.എന്‍.ടി.യു.സി യൂനിയനുകള്‍ പോര്‍ട്ട് ഓഫിസര്‍, ഫറോക്ക് അസി.ലേബര്‍ ഓഫിസര്‍, കാരാറുകാരുടെ സംഘടന എന്നിവര്‍ക്ക് നോട്ടിസ് നല്‍കി. സപ്തംബര്‍ ആദ്യവാരത്തില്‍ പോര്‍ട്ട് ഓഫീസറും ഇക്കഴിഞ്ഞ 29ന് ജില്ലാ ലേബര്‍ ഓഫീസറും ചര്‍ച്ചക്ക് വിളിച്ചെങ്കിലും വെസല്‍ വെസല്‍ ഏജന്റുമാരുടെ സംഘടനാ നേതൃത്വം കൂലി വര്‍ധനവിനെതിരായി നിലപാടില്‍ ഉറച്ച് നില്‍ക്കുകയായിരുന്നു.
 തൊഴിലാളികളുടെ കൂലിവര്‍ധനവ് സംബന്ധിച്ചു ചര്‍ച്ച നടത്തി തുറമുഖത്തെ ചരക്ക് നീക്കം ആരംഭിക്കുന്നതിനുളള നടപടികള്‍ സ്വീകരിക്കണമെന്നു തൊഴിലാളിക സംഘടന പ്രതിനിധികളായ സി.ഷംസുദ്ദീന്‍, നവാസ്, യു.ബാബു എന്നിവര്‍ വാര്‍ത്താകുറിപ്പില്‍ ആവശ്യപ്പെട്ടു.