പുത്തനത്താണി: ശുചിത്വമുള്ള നാടിനായി കരുത്തുറ്റ തലമുറക്കായി കുട്ടികള്‍ കൈക്കോട്ടും ചൂലുമെടുത്ത് ടൗണിലിറങ്ങി വൃത്തിയാക്കി. കല്‍പകഞ്ചേരി ഫോക്കസ് ഓപ്പണ്‍ സ്‌കൗട്ട് ട്രൂപ്പിലെ കുട്ടികളാണ് 'മാലിന്യ മുക്തമാവട്ടെ നമ്മുടെ നാട്'  എന്ന പ്രതിജ്ഞയുമായി കൈക്കോട്ടും ചൂലും കൊട്ടയുമെടുത്ത് കടുങ്ങാത്ത്കുണ്ട് ടൗണും പരിസരവും വൃത്തിയാക്കിയത്. മാലിന്യങ്ങള്‍ പ്രത്യേകം തരം തിരിച്ച് ശേഖരിച്ചാണ് ശുചീകരണ പ്രവര്‍ത്തനങ്ങള്‍ നടത്തിയത്. വ്യാപാരി വ്യവസായി ഏകോപന സമിതി ഭക്ഷണവും മറ്റും നല്‍കി ശുചീകരണ പ്രവര്‍ത്തനത്തില്‍ പങ്കാളികളായി. കല്‍പകഞ്ചേരി ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍, എം.എസ്.എം ഹയര്‍ സെക്കന്‍ഡറി സ്‌കൂള്‍ കല്ലിങ്ങല്‍പറമ്പ്, ചേരൂരാല്‍ എച്ച്.എസ്.എസ്, വളവന്നൂര്‍ അന്‍സാര്‍ സ്‌കൂള്‍, എം.ഇ.എസ് സ്‌കൂള്‍ അല്ലൂര്‍, റഹ്മാനിയ സ്‌കൂള്‍ രണ്ടത്താണി എന്നിവിടങ്ങളിലെ സ്‌കൗട്ട് ആന്റ് ഗൈഡ്‌സ് വിദ്യാര്‍ഥികളും ശുചീകരണ പ്രവര്‍ത്തനത്തില്‍ പങ്കാളികളായി.
കല്‍പകഞ്ചേരി ഗ്രാമപഞ്ചായത്ത് പ്രസിഡന്റ് എന്‍.കുഞ്ഞാപ്പു ഉദ്ഘാടനം ചെയ്തു. കുന്നത്ത് ഷറഫുദ്ദീന്‍, ബീരാന്‍ ഹാജി, വൈസ്. പ്രസിഡന്റ് ജുബൈരിയ്യ, വ്യാപാരി വ്യവസായി പ്രസിഡന്റ് ടി.മുജീബ്, കല്‍പകഞ്ചേരി ജി.വി.എച്ച്.എസ്.എസ് ഒ.എസ്.എ സെക്രട്ടറി സി.പി രാധാകൃഷ്ണന്‍, പി.മുഹമ്മദ് യാസര്‍, സുബൈര്‍ കല്ലന്‍ സംസാരിച്ചു. ശുചീകരണത്തിന് സി.പി നൂറുല്‍ അമീന്‍,  യൂനുസ് മയ്യേരി, അക്ബര്‍ നേതൃത്വം നല്‍കി.