മലപ്പുറം: തീരപ്രദേശങ്ങളില്‍ പൊലീസിന്റെ സഹായത്തോടെ സി.പി.എം അക്രമങ്ങള്‍ നടത്തുന്നെന്നാരോപിച്ചു മുസ്‌ലിംലീഗ് ജില്ലാ കമ്മിറ്റിയുടെ നേതൃത്വത്തില്‍ നാളെ  എസ്.പി. ഓഫിസിലേക്ക് മാര്‍ച്ച് നടത്തും. മാര്‍ച്ച് രാവിലെ 10 ന് മലപ്പുറം കിഴക്കേതല സുന്നിമഹല്‍ പരിസരത്തുനിന്നാരംഭിക്കും. കുന്നുമ്മലില്‍ നിന്നും പെരിന്തല്‍മണ്ണ റോഡ് വഴിയാണു മാര്‍ച്ച് എസ്.പി ഓഫിസ് ലക്ഷ്യമാക്കി നീങ്ങുക. ജില്ലയിലെ ആയിരക്കണക്കിന് മുസ്‌ലിംലീഗ് പ്രവര്‍ത്തകര്‍ മാര്‍ച്ചില്‍ അണിനിരക്കും. മുസ്‌ലിംലീഗ് ദേശീയ ട്രഷറര്‍ പി.കെ. കുഞ്ഞാലിക്കുട്ടി ഉദ്ഘാടനം ചെയ്യും. ജില്ലാ പ്രസിഡന്റ് സയ്യിദ് സാദിഖലി ശിഹാബ് തങ്ങള്‍, സംസ്ഥാന ജനറല്‍ സെക്രട്ടറി കെ.പി.എ. മജീദ്, ദേശീയ സെക്രട്ടറി ഇ.ടി. മുഹമ്മദ് ബഷീര്‍ എം.പി തുടങ്ങിവര്‍ അഭിവാദ്യമര്‍പ്പിച്ചു സംസാരിക്കും.