പട്ടാമ്പി: ഗാന്ധിജയന്തിയോടനുബന്ധിച്ച് ഗ്രാമങ്ങളിലും പട്ടണങ്ങളിലും യുവാക്കളടക്കമുള്ള വിവിധ രാഷ്ട്രീയ സാമൂഹ്യസാംസ്‌കാരിക സേവനങ്ങളില്‍ മുഴുകിയവര്‍ ശുചീകരണയജ്ഞത്തില്‍ പങ്കാളികളായി. നാഗലശ്ശേരി ശ്രീപതി കോളജിലെ എന്‍.എസ്.എസ് വിദ്യാര്‍ഥികള്‍ വെള്ളിയാങ്കല്ല് പൈതൃക പാര്‍ക്ക് ശുചീകരിച്ചു. കൊണ്ടൂര്‍ക്കര എ.എം.എല്‍.പി സ്‌കൂളിലെ പൂര്‍വ്വ വിദ്യാര്‍ഥികള്‍ സ്‌കൂളിലെ ചുമരുകള്‍ക്ക് വൈറ്റ് വാശ് അടിച്ച് ശുചീകരണത്തില്‍ പങ്കാളികളായി. ഇടിയത്ത് മോഹന്‍ദാസ് ടൗണിലെ ബസ് സ്‌റ്റോപ്പ് കേന്ദ്രങ്ങള്‍ അടിച്ച് വാരി വൃത്തിയാക്കിയും മാലിന്യങ്ങള്‍ നീക്കം ചെയ്തു. കിഴായൂര്‍ മേഖല ബി.ജെ.പി കമ്മിറ്റിയുടെ നേതൃത്വത്തില്‍ ഹെല്‍ത്ത് സെന്ററില്‍ ശുചീകരണപ്രവര്‍ത്തനങ്ങള്‍ നടത്തി.
ഒറ്റപ്പാലം: ലെക്കിടി ജവഹര്‍ലാല്‍ എന്‍ജിനീയറിങ് കോളജിലെ എന്‍.എസ്.എസ് യൂനിറ്റുകളുടെ നേതൃത്വത്തില്‍ ഗാന്ധിജയന്തി ആചരിച്ചു. വിദ്യാര്‍ഥികളുടെ ശ്രമദാന പ്രവര്‍ത്തനങ്ങളുടെ ഭാഗമായി ലെക്കിടി കൂട്ടുപാതയിലെ ബസ് വെയിറ്റിങ് ഷെഡുകള്‍ ശുചീകരിച്ചു. റോഡരികിലെ പൊന്തക്കാടുകള്‍ വെട്ടി വൃത്തിയാക്കി.  പാലപ്പുറം അങ്കണവാടിയില്‍ ലിംഗസമത്വം എന്ന വിഷയത്തില്‍ ബോധവല്‍ക്കരണ ക്ലാസും ഹ്രസ്വചിത്രപ്രദര്‍ശനവും നടത്തി.
ഒരാഴ്ച നീണ്ടു നിന്ന 'മാനവീയം' പരിപാടിയുടെ സമാപനം കോളജ് അക്കാദമിക്ക് ഡയറക്ടര്‍ ഡോ. യു. ലാസര്‍ ജോണ്‍ ഉദ്ഘാടനം ചെയ്തു. പ്രോഗ്രാം ഓഫിസര്‍മാരായ എന്‍. ഷാനില്‍ മുഹമ്മദ്, ജി. ജയേഷ്, കെ. ബാബുരാജ് സംസാരിച്ചു.
കൂറ്റനാട്: ഗാന്ധി ജയന്തി ദിനത്തോടനുബന്ധിച്ചു കക്കാട്ടിരി ടൗണ്‍ മുസ്‌ലിം ലീഗ് കമ്മിറ്റിയുടെ നേതൃത്വത്തില്‍ ശുചീകരണം നടത്തി. കക്കാട്ടിരി മെയിന്‍ റോഡിലെയും വേണാട്ടുകുന്ന് റോഡിലെയും പൊന്തക്കാടുകളും ഓവുചാലുകളും വൃത്തിയാക്കി. ടി മൊയ്തീന്‍കുട്ടി, പാദുക നൗഷാദ്, കെ.വി ഹംസ, കെ.പി. കുഞ്ഞാപ്പ ഹാജി, എം.ടി അലി, ഖാദര്‍ കക്കാട്ടിരി, ഉമ്മര്‍ എ, ടി.പി ഷഫീഖ്, കെ.വി ബഷീര്‍, എ.വി ഷഫീഖ്, എം.ടി അബ്ദുള്ള നേതൃത്വം നല്‍കി.
ആനക്കര: ഗാന്ധിജയന്തിയോടനുബന്ധിച്ച് വാവനൂര്‍ ശ്രീപതി എന്‍ജിനീയറിങ് കോളജിലെ എന്‍.എസ്.എസ് യൂനിറ്റിന്റെ നേതൃത്വത്തില്‍ വെള്ളിയാംകല്ല് പൈതൃക പാര്‍ക്കും പരിസരവും ശുചീകരിച്ചു. ഇതോടനുബന്ധിച്ച് നടന്ന ചടങ്ങ് പഞ്ചായത്ത് പ്രസിഡന്റ് ടി. ശാന്തകുമാരി ഉദ്ഘാടനം ചെയ്തു. വാര്‍ഡ് മെമ്പര്‍ പി.ടി. ഷംസുദ്ധീന്‍ അധ്യക്ഷനായി. ബ്ലോക്ക് മെമ്പര്‍ പി. വാസുദേവന്‍, പി.ടി. അബൂബക്കര്‍ (ഡി.ടി.പി.സി), എന്‍.എസ്.എസ് പ്രോഗ്രാം ഓഫിസര്‍ ശരത് ശങ്കര്‍, സൂരജ് ആശംസകള്‍ അര്‍പ്പിച്ചു. പി. ഭവേഷ് സ്വാഗതവും ശ്രീഭദ്ര നന്ദിയും പറഞ്ഞു.
എടത്തനാട്ടുകര: മൂച്ചിക്കല്‍ ഗവ. എല്‍.പി സ്‌കൂളില്‍ ഗാന്ധി ജയന്തി ആഘോഷിച്ചു. സ്‌കൂളിലെയും റോഡിലെയും പ്ലാസ്റ്റിക് മാലിന്യങ്ങള്‍ പെറുക്കി മാറ്റി. റോഡിലെ കാട് പറിച്ച് വ്യത്തിയാക്കി. ആഴ്ചയിലൊരിക്കല്‍ എല്ലാ വീടുകളിലും ഡ്രൈഡെ ആചരിക്കാന്‍ നിര്‍ദേശം നല്‍കി. ഗാന്ധി ക്വിസ് മത്സരത്തില്‍ ഒ. അഫ്‌നാന്‍ അന്‍വര്‍, എം. കെ. കൈലാസ് പ്രസാദ്, കെ. നിദ  എന്നിവര്‍ ഒന്നു മുതല്‍ മൂന്നു വരെ സ്ഥാനങ്ങള്‍ നേടി.
സീനിയര്‍ അസിസ്റ്റന്റ് ടി.എം. ഓമനാമ്മ ഉദ്ഘാടനം ചെയ്തു. പ്രവര്‍ത്തനങ്ങള്‍ക്ക് അധ്യാപകരായ പി. അബ്ദുസ്സലാം, സി.കെ. ഹസീന മുംതാസ്, കെ. രമാ ദേവി, പി. ജിഷ, സി.എം. അയിഷാ ബീവി,  ഇ. പ്രിയങ്ക,  കെ. ഷീബ, പി. പ്രിയ, സ്‌കൂള്‍ ലീഡര്‍ കെ. ജ്യോതിക, സ്‌കൂള്‍ മുഖ്യമന്ത്രി  കെ. നിദ, ഉപ മുഖ്യമന്ത്രി അദീബ് പൂതാനി, ആരോഗ്യ വകുപ്പ് മന്ത്രിമാരായ  കെ. നിഖില്‍ കൃഷ്ണ, കെ. അശ്വിന്‍ രാജ്, പി. ദേവികാ രാജേഷ്, എം സായൂജ്യ നേതൃത്വം നല്‍കി.