റിയാദ്: യമനിലെ കലാപകാരികളായ ഹൂതികള്‍ യു.എ.ഇ കപ്പലിനെതിരെ കടലിടുക്കില്‍ വച്ച് ആക്രമണം നടത്തി. സോമാലിയക്കും യമനിനും ഇടയിലുള്ള ബാബ് അല്‍ മന്‍ദബ് കപ്പല്‍ ചാലിലാണ് കഴിഞ്ഞ ദിവസം ഹൂതി തീവ്രവാദികള്‍ ആക്രമണം നടത്തി കപ്പല്‍ പിടികൂടാന്‍ ശ്രമം നടത്തിയതെന്ന് അറബ് സഖ്യ സേനയുടെ പിന്തുണയുള്ള യമന്‍ പ്രസിഡന്റ് അബ്ദുറബ്ബ് മന്‍സൂര്‍ ഹാദി അന്താരാഷ്ട്ര മാധ്യമങ്ങളോട് വ്യക്തമാക്കി. ഇതോടെ അന്താരാഷ്ട്ര കപ്പലുകള്‍ക്ക് ഇതേ പാതയില്‍ സഞ്ചരിക്കുന്നതിനു വന്‍  ഭീഷണിയാണ് ഹൂതികളെന്നും വ്യക്തമായതായി അദ്ദേഹം പറഞ്ഞു.
    യമനിലെ ഏദനിലേക്ക്  സഹായ ഹസ്തവുമായി പുറപ്പെട്ട കപ്പലാണ് ഹൂതികള്‍ ആക്രമിച്ചു കീഴടക്കിയത്. റോക്കറ്റുകളും മറ്റു ആയുധങ്ങളും ഉപയോഗിച്ചാണ് ഹൂതികള്‍ കപ്പല്‍ തകര്‍ക്കാന്‍ ശ്രമിച്ചത്. എന്നാല്‍ അറബ് സഖ്യ സൈന്യത്തിന്റെ നാവിക സേന വിഭാഗം ഹൂതികള്‍ളെ തുരത്തി കപ്പല്‍ സംരക്ഷിക്കുകയായിരുന്നു. ആക്രമണം നേരിട്ട കപ്പലില്‍ നിന്നും ജീവനക്കാരെ സഖ്യ സേന രക്ഷപ്പെടുത്തിയിട്ടുണ്ട്. ബാബ് അല്‍ മന്‍ദബ് കപ്പല്‍ ചാലില്‍ കൂടി സഞ്ചരിക്കുന്നവര്‍ക്ക് ഹൂതികളുടെ ആക്രമണം ഭീഷണിയായി മാറിയതായി വ്യക്തമായതായി സഖ്യ സേന വ്യക്തമാക്കി.