പയ്യന്നൂര്‍: മാതമംഗലം കുറ്റൂര്‍ ആദിത്യകിരണ്‍ കോളജില്‍ എസ്.എഫ്.ഐ-എം.എസ്.എഫ് സംഘര്‍ഷം. ഇന്നലെ ഉച്ചയോടെ മുതിര്‍ന്ന വിദ്യാര്‍ഥികള്‍ ഒന്നാം വര്‍ഷ വിദ്യാര്‍ഥികളെ ശാരീരികവും മാനസികവുമായി പീഡിപ്പിക്കുന്നുവെന്ന പരാതിയെ തുടര്‍ന്ന് കോളജിലെത്തിയ എസ്.എഫ്.ഐ പ്രവര്‍ത്തകരെ മുപ്പതോളം എം.എസ്.എഫ് പ്രവര്‍ത്തകര്‍ മര്‍ദിക്കുകയായിരുന്നുവെന്നാണ് ആരോപണം. സംഘര്‍ഷത്തില്‍ രണ്ട് എം.എസ്.എഫ് പ്രവര്‍ത്തകര്‍ക്കും ഒരു എസ്.എഫ്.ഐ പ്രവര്‍ത്തകനും മര്‍ദനമേറ്റു.
എസ്.എഫ്.ഐ യൂനിറ്റ് സെക്രട്ടറിയും കോളജ് യൂനിയന്‍ ചെയര്‍മാനുമായ അര്‍ജുന്‍, മൂന്നാം വര്‍ഷ വിദ്യാര്‍ഥികളും എം.എസ്.എഫ് പ്രവര്‍ത്തകരുമായ മാടായി, മാട്ടൂല്‍ സ്വദേശികളായ ജവാദ്, മുഹമ്മദ് ഷാനി എന്നിവര്‍ക്കാണ് പരുക്കേറ്റത്.
ഇവരെ പയ്യന്നൂരിലെ സ്വകാര്യ ആശുപത്രികളില്‍ പ്രവേശിപ്പിച്ചു. വൈകുന്നേരത്തോടെ സംഘടിച്ചെത്തിയ എസ്.എഫ്.ഐ പ്രവര്‍ത്തകര്‍ എം.എസ്.എഫ് പ്രവര്‍ത്തകരെ ആക്രമിച്ചു.
കെട്ടിടത്തിന്റെ ചില്ലും കോളജിന് മുന്നില്‍ നിര്‍ത്തിയിട്ട ബൈക്കും അടിച്ചു തകര്‍ത്തു. പെരിങ്ങോം പൊലിസ് സ്ഥലത്തെത്തി.