മംഗളൂരു: സുള്ള്യയിലെ കോണ്‍ഗ്രസ് മൈനോറിറ്റി വിങ് യൂണിറ്റ് പ്രസിഡന്റ് ഇസ്മായിലിനെ കാര്‍ തടഞ്ഞു നിര്‍ത്തി വെട്ടിക്കൊലപ്പെടുത്തിയ സംഭവത്തില്‍ ഏഴു പേരെ കര്‍ണാടക പൊലിസ് അറസ്റ്റ് ചെയ്തു. ബണ്ട്വാള്‍ കുലൈമനയിലെ മുന്ന എന്ന അബ്ദുല്‍ റഷീദ് (32), കൃഷ്ണപുരയിലെ അബ്ബാസ് (32), വാടക കൊലയാളിയായ കെഡിലയിലെ എ.കെ ഉമര്‍ ഫാറൂഖ് (32), റഹ്മാന്‍ ബെള്ളാരെ, യാക്കൂബ് ബിജയ്, ഫാറൂഖ് ബെള്ളാരെ, സുഹൈല്‍ നന്താവര എന്നിവരെയാണ് പൊലിസ് അറസ്റ്റ് ചെയ്തത്. സംഭവ സമയത്ത് പ്രതികള്‍ ഉപയോഗിച്ച കെ.എ 19 എം.ബി 3068 നമ്പര്‍ റിറ്റ്‌സ് കാറും പൊലിസ് കസ്റ്റഡിയിലെടുത്തു.

ഭൂമി ഇടപാടിലുണ്ടായ വൈരാഗ്യമാണ് കൊലയ്ക്ക് പിന്നിലെന്ന് വ്യക്തമായതായി പൊലിസ് പറയുന്നു. കൊലപാതക സംഭവത്തില്‍ പഴുതടച്ചുള്ള അന്വേഷണം പൊലിസ് നടത്തിയതോടെയാണ് പ്രതികളെ എളുപ്പത്തില്‍ പിടികൂടാന്‍ പൊലിസിനു സഹായകരമായത്. സുള്ള്യ താലൂക്ക് പഞ്ചായത്ത് മുന്‍ മെംബറും കോണ്‍ഗ്രസ് നേതാവുമായ വാഹിദയുടെ ഭര്‍ത്താവാണ് കൊല്ലപ്പെട്ട ഇസ്മായില്‍. മംഗളൂരു പൊലിസ് ചീഫ് ഗുലാബ് റാവു ബുറാസെ വാര്‍ത്താ സമ്മേളനത്തിലാണ് പ്രതികളെ അറസ്റ്റു ചെയ്ത വിവരം പുറത്തു വിട്ടത്.

കഴിഞ്ഞ മാസം 23 നാണ് ഇസ്മായിലിനെ കൊലയാളികള്‍ കാര്‍ തടഞ്ഞു നിര്‍ത്തി ക്രൂരമായി വെട്ടിക്കൊലപ്പെടുത്തിയത്. വെള്ളിയാഴ്ച ജുമുഅ നിസ്‌കാരം കഴിഞ്ഞു കാറില്‍ വീട്ടിലേക്കു പോവുകയായിരുന്ന ഇസ്മായിലിനെ പിന്തുടര്‍ന്നെത്തിയെ സംഘം സുള്ള്യയിലെ ഐവര്‍നാട്ടില്‍ നാട്ടില്‍ വച്ചാണ് വാഹനം തടഞ്ഞു നിര്‍ത്തി കൊലപ്പെടുത്തിയത്.