വെള്ളറട: നിയമസഭാ തെരഞ്ഞെടുപ്പ് ലക്ഷ്യമിട്ട് വന്‍തോതില്‍ സ്പിരിറ്റും കള്ളനോട്ടുകളും അതിര്‍ത്തി കടത്തുന്നു.പാറശാല, കളിയിക്കാവിള, ചെങ്കവിള, ചെമ്പകപ്പാറ, കടുക്കറ, പനച്ചമൂട്, പുലിയൂര്‍ശാല, ചെറിയകൊല്ല, നിലമാംമൂട് വഴിയാണ് വന്‍തോതില്‍ ഇവ ജില്ലയിലേക്കെത്തുന്നത്. പലപ്പോഴും ഇത് സംബന്ധിച്ചു പൊലിസിനു വിവരം നല്‍കിയാലും നടപടിയുണ്ടാകാറില്ലെന്നു പ്രദേശവാസികള്‍ പറയുന്നു. ആഡംബര കാറുകള്‍, മുട്ടലോറികള്‍, സ്‌കൂട്ടര്‍, കണ്ടെയ്‌നര്‍ വാഹനങ്ങളിലും ഒളിപ്പിച്ചാണ് സ്പിരിറ്റും കള്ളനോട്ടുകളും കടത്തുന്നത്. 50, 100, 500, 1000 രൂപയുടെ കള്ളനോട്ടുകളാണ് കടത്തുന്നത്. 50 രൂപയുടെ കള്ളനോട്ടുകള്‍ വെള്ളറട, പനച്ചമൂട്, ചെറിയകൊല്ല, അമ്പൂരി, കാരക്കോണം പാറശാല ഭാഗങ്ങളില്‍ പലര്‍ക്കും ലഭിച്ചതായി വിവരമുണ്ട്. പനച്ചമൂട് കേന്ദ്രീകരിച്ചാണ് നോട്ടുകളുടെ കൈമാറ്റം നടക്കുന്നത്. ചന്തയിലെ രാത്രി കച്ചവടങ്ങളുടെ മറവിലും കള്ളനോട്ടു വിപണനം നടക്കുന്നതായി സൂചനയുണ്ട്.