മഞ്ചേരി:  കിണറില്‍ ഇറങ്ങി തിരിച്ചുകയറാന്‍ കഴിയാത്തയാളെ മഞ്ചേരി ഫയര്‍ഫോഴ്‌സെത്തി രക്ഷപ്പെടുത്തി. മഞ്ചേരി  തുറക്കല്‍  സ്വദേശി  നാലകത്തുവീട്ടില്‍  മുഹമ്മദ് മകന്‍  നിഅ്മത്തലി(30)യാണു തിരിച്ചുകയറാനാവാതെ കുഴങ്ങിയത്. ഇന്നലെ ഉച്ചയ്ക്കു രണ്ടോടെയായിരുന്നു സംഭവം.   ശുചീകരണം നടത്താനാണിയാള്‍  വീട്ടുമുറ്റത്തെ കിണറില്‍ ഇറങ്ങിയിരുന്നത്.   
ശുചീകരണം നടത്തി തീര്‍ന്നശേഷം  കിണറില്‍ നിന്നും പുറത്തുവരുന്നതിനിടെ  വീണ്ടും കിണറിലേക്കുതന്നെ വീഴുകയായിരുന്നു. 40 അടി താഴ്ചയും 10 അടിവരെ വെള്ളവും ഉള്ള കിണറാണങ്കിലും  ഉടന്‍ അഗ്നിശമനസേന എത്തി  പരുക്കുകള്‍ ഏല്‍ക്കാതെ  രക്ഷപ്പെടുത്തി.  
ഫയര്‍മാന്‍  എം.പ്രദീപ്കുമാര്‍ കിണറില്‍ ഇറങ്ങി നെറ്റ് ഉപയോഗിച്ചാണ് ഇയാളെ പുറത്തെത്തിച്ചത്  .സ്റ്റേഷന്‍ ഓഫിസര്‍ പി.ടി ഉമ്മറിന്റെ നേതൃത്വത്തിലുള്ള സംഘത്തില്‍  സിസില്‍ദാസ്, രഘുനാഥ്, സൈനുല്‍ആബിദ് എന്നി സേനാംഗങ്ങളും ഉണ്ടായിരുന്നു.