ശ്രീനഗര്‍: ജമ്മു കശ്മിരിലെ ഹന്ദ്വാരയില്‍ ഇന്ത്യന്‍ സൈനിക ക്യാംപിനു സമീപം ആക്രമണം നടത്തിയ ഭീകരില്‍നിന്നു കണ്ടെടുത്തത് പാക് നിര്‍മിത ആയുധങ്ങളും ഭക്ഷണവും.

പാക് നിര്‍മിത എകെ 47 തോക്കുകള്‍, ഗ്രനേഡ് ലോഞ്ചറുകള്‍, വെടിമരുന്നുകള്‍, ജിപിഎസ് സംവിധാനങ്ങള്‍, റേഡിയോ, പ്രാദേശികഭൂപടം തുടങ്ങിയവ സൈന്യം കണ്ടെടുത്തു.

ഇന്ന് പുലര്‍ച്ച അഞ്ച് മണിയോടെയാണ് ആക്രമണം ഉണ്ടായത്. ഒരു മണിക്കൂറോളം നീണ്ട പോരാട്ടത്തിലാണ് മൂന്നു ഭീകരരേയും കൊലപ്പെടുത്താനായത്.

ജോലികഴിഞ്ഞ് വിശ്രമിക്കുകയായിരുന്ന 30 രാഷ്ട്രീയ റൈഫിള്‍സ് ക്യാംപിലെ സൈനികര്‍ക്കുനേരേയാണ് ആക്രമണം ഉണ്ടായത്. രണ്ട് സെന്‍ട്രി പോസ്റ്റുകള്‍ ഭീകരര്‍ ആക്രമിച്ചു.

നിയന്ത്രണ രേഖയില്‍ മൂന്നുതവണ നുഴഞ്ഞുകയറാന്‍ ശ്രമിച്ച ഭീകരര്‍ക്ക് പാക് സൈന്യത്തിന്റെ പിന്തുണയുണ്ടായിരുന്നുവെന്ന് ഇന്ത്യന്‍ സൈന്യം വ്യക്തമാക്കി.

കഴിഞ്ഞ അഞ്ചുദിവസങ്ങളിലായി 25 തവണയാണ് പാകിസ്താന്‍ വെടിനിര്‍ത്തല്‍ കരാര്‍ ലംഘിച്ചത്.