പത്തനംതിട്ട: കേരളത്തില്‍ മാധ്യമ പ്രവര്‍ത്തനം കരുതല്‍ തടങ്കലിലെന്നും ഇത് സംസ്ഥാനത്തിന്റെ സല്‍പ്പേരിന് കളങ്കമുണ്ടാക്കുമെന്നും പ്രമുഖ മാധ്യമപ്രവര്‍ത്തകന്‍ ഡോ. സെബാസ്റ്റ്യന്‍ പോള്‍.


പ്രസ് ക്ലബ് സംഘടിപ്പിച്ച ഷാജി അലക്‌സ് അനുസ്മരണ സമ്മേളനത്തില്‍ 'അസഹിഷ്ണുതയെ ചെറുക്കുന്നതില്‍ മാധ്യമങ്ങളുടെ പങ്ക്' എന്ന വിഷയത്തില്‍ സ്മാരക പ്രഭാഷണം നടത്തുകയായിരുന്നു അദ്ദേഹം.


ഹൈകോടതി അടക്കമുള്ള കോടതികളില്‍ മാധ്യമ വിലക്ക് തുടരുന്ന സാഹചര്യത്തെ ഉയര്‍ത്തിക്കാട്ടിയായിരുന്നു പ്രഭാഷണം.


കോടതിയില്‍ മാധ്യമങ്ങളെ തടയുന്നത് ഭരണഘടനാ വിരുദ്ധമാണ്. ഇത് തുടരുന്നത് വലിയ തോതിലുള്ള ആപത്ത് ക്ഷണിച്ചു വരുത്തും. സ്വതന്ത്ര മാധ്യമപ്രവര്‍ത്തനം തടസപ്പെടുത്തിയാല്‍ ശരിയായ നീതി നിര്‍വഹണം നടക്കില്ല.


അടച്ചിട്ട മുറിയില്‍ നടത്തേണ്ടതല്ല നീതി നിര്‍വഹണം. അത് ജനങ്ങള്‍ അറിയണം. അതിന് മാധ്യമ സ്വാതന്ത്ര്യം ആവശ്യമാണ്. എന്നാല്‍ ഇവിടെ ഭരണഘടന കല്‍പ്പിച്ചു നല്‍കുന്ന ജനങ്ങളുടെ അറിയാനുള്ള അവകാശത്തെയാണ് നിയമജ്ഞര്‍ ഹനിക്കുന്നത്.

മാധ്യമങ്ങള്‍ ആരുടെ മുമ്പിലും വഴങ്ങേണ്ട കാര്യമില്ല. ധനേഷ് മാഞ്ഞൂരാന്‍ കേസാണ് പ്രശ്‌നങ്ങള്‍ക്കു തുടക്കമെന്നത് തെറ്റായ ധാരണയാണ്. അടക്കിവച്ചിരുന്ന മാധ്യമവിരോധം പ്രകടിപ്പിക്കാനുള്ള അവസരമാക്കി അഭിഭാഷകര്‍ അതിനെ ഉപയോഗിക്കുകയായിരുന്നു.



മാധ്യമ വിരോധത്തില്‍ അഭിഭാഷകരേക്കാള്‍ കടുത്ത നിലപാട് സ്വീകരിക്കുന്നത് ജഡ്ജിമാരാണെന്നും സെബാസ്റ്റ്യന്‍ പോള്‍ കുറ്റപ്പെടുത്തി. കഴിഞ്ഞ ദിവസം നടന്ന ചര്‍ച്ചയില്‍ പങ്കെടുത്ത എട്ടു ജഡ്ജിമാരില്‍ ഏഴു പേരും മാധ്യമവിലക്കിനെ അനുകൂലിച്ച് നിലപാട് സ്വീകരിച്ചത് ഇതിനു തെളിവാണ്. ജഡ്ജിമാരുടെ ചേംബര്‍ അവരുടെ സ്വകാര്യ ഇടങ്ങളല്ല.


അത് കോടതിയുടെ ഭാഗമാണ്. അവിടെ മാധ്യമപ്രവര്‍ത്തകര്‍ക്ക് പ്രവേശനം നിഷേധിക്കുന്നത് ഭരണഘടനാ വിരുദ്ധമാണ്. ഇത്തരത്തില്‍ അവഹേളനം തുടരുന്ന സാഹചര്യത്തില്‍ അഭിഭാഷകരുടെ പേരുകള്‍ വാര്‍ത്തയില്‍ നിന്നൊഴിവാക്കി ഒരു സര്‍ജിക്കല്‍ സ്‌ട്രൈക്കിന് മാധ്യമപ്രവര്‍ത്തകര്‍ തയാറാകണമെന്നും ഇന്ത്യന്‍ സേന പാക്കിസ്ഥാനില്‍ നടത്തിയ സര്‍ജിക്കല്‍ ആക്രമണത്തെ ഉദ്ധരിച്ച് സെബാസ്റ്റ്യന്‍ പോള്‍ പറഞ്ഞു. ഹൈക്കോടതി വാര്‍ഷികമായ നവംബര്‍ ഒന്ന് ഇതിനു പറ്റിയ സമയമാണെന്നും അദ്ദേഹം ചൂണ്ടിക്കാട്ടി.


സുപ്രീം കോടതി ചീഫ് ജസ്റ്റിസ് വരെ പങ്കെടുക്കുന്ന പരിപാടി റിപ്പോര്‍ട്ട് ചെയ്യപ്പെടാതിരുന്നാല്‍ അത് അഭിഭാഷകര്‍ക്ക് ക്ഷീണമാകും. അപ്പോള്‍ അവര്‍ തന്നെ പ്രശ്‌നപരിഹാരത്തിന് ശ്രമിക്കും. തങ്ങള്‍ക്ക് അസ്വീകാര്യമായ വിഷയങ്ങള്‍ പറയുന്നവര്‍ക്ക് അതിനുള്ള സ്വാതന്ത്ര്യം ഉറപ്പു വരുത്തുകയാണ് അഭിഭാഷകര്‍ പ്രധാനമായും ചെയ്യേണ്ടതെന്നും അദ്ദേഹം ഓര്‍മ്മിപ്പിച്ചു.

 അതേസമയം മാധ്യമപ്രവര്‍ത്തകരിലും അസഹിഷ്ണുത വളരുന്നുണ്ടെന്നും സെബാസ്റ്റ്യന്‍ പോള്‍ കുറ്റപ്പെടുത്തി. വിമര്‍ശകരെ ഉള്‍ക്കൊള്ളാന്‍ മാധ്യമങ്ങളും മാധ്യമപ്രവര്‍ത്തകരും തയാറാകണം എന്നും കൈയില്‍ കിട്ടുന്നതല്ല തേടിപ്പിടിക്കുന്നതാകണം വാര്‍ത്തയെന്നും അദ്ദേഹം പറഞ്ഞു.